Shillong, Rymphang 12: Ka Khasi Students Union (KSU)Mawlai Circle ha ka 8 tarik mynta u bnai ka la ai da ka jingujor sha u Principal jong ka Sacred Hearts Boys Higher Secondary School, Mawlai u Fr T. Kharsyntiew halor ka jingthoh bakla ia ka kyrteng jong ka shnong Mawlai ha ki Sweaters jong ki khynnah skul ka Sacred Heart Boy’s Higher Secondary School.
Katkum ka jingthoh ha ki Sweater ha ka jaka ban thoh ‘Mawlai’ la thoh pynban ‘Mawali’. Kane ka jingbakla ban thoh ia ka kyrteng jong ka shnong Mawlai ka la ktah bad wanrah ka jingsngewdiaw ia kiba bun ki paidbah nongshong jong ka shnong Mawlai kumjuh ia ki khynnah skul ba pule ha Sacred Boy’s Higher Secondary School, Mawlai.
Ka seng ka la pynsngew sha u Principal ba un phah pynbeit noh ia kane ka jingthoh bakla bad ban ai noh da kiwei ki Sweater kiba biang bad ba beit ka jingthoh bad spelling kaba dei jong ka shnong Mawlai.
Na ka liang jong u Principal u la pyntip sha ka seng ba ka skul ka don ka jingiateh bad ka H.B.Textiles (school uniform embroidery dealership) na ka bynta ban pynbiang ia ki Uniform School jong ki khynnah skul bad ka don ka jingleh bakla na ka liang ka H.B.Textiles bad tang ioh jingtip ba ka don ka jingshon bakla ha ki Sweater u la phah pynbna ha Assembly ban phah lum lut baroh ki Sweater jong ki khynnah ba don ka jingbakla ka jingthoh bad pyntip ruh ba ki sweater kiba don ka jingbakla ka jingthoh ki dei na ka size 26 bad 38 bad ym baroh.
U Principal u la pynpaw ruh kum ka skul hi baroh kawei ki ngewsih ha kaba ia dei bad ka jingshon bakla ia ka kyrteng jong ka shnong Mawlai namar kane ka jingbakla ka la ktah ia ka skul bad ia ka shnong Mawlai hi baroh kawei.
