Shilong, Nailar, 9: Ki dkhot jong ka Village Defence Party (VDP) Sonapyrdi, East Jaiñtia Hills District ba la lamkhmat da u President u Bah Boikmen Mynthoi bad u Assistant Secretary ka VDP BahStephan Lamare ha ka janmiet sngi Thohdieng katba ki dang ïaid pahara hapoh ka shnong ki la ïoh bat ïa uwei u mynder na ka ri Bangladesh uba la rung beaiñ shapoh u pud u sam jong ka ri India lyngba ka khappud India-Bangladesh na East Jaiñtia Hills District.
Hadien ba la ïohkem ïa une u mynder na ka ri Bangladesh, ha ka jingtohkit une u mynder u la phla ba u wan na ka ri Bangladesh bad u thmu ban leit sha Ladrymbai. Hadien hadien kane, ki dkhot ka VDP ki la leit ban aiti noh ha ki Pulit jong ka Lumshnong Police Station ban leh ïa kaba donkam.
“Ka VDP Sonapyrdi ka sngewlyngngoh kumno une u mynder na ka ri Bangladesh u ïohlad ban rung beaiñ sha ri India ha kum kane ka por kaba dang don ka jingïakynad ha ka Ri Bangladesh bad haba la pynjari ruh da ka korphiw miet,” la buh jingkylli ka VDP.
Ka VDP Sonapyrdi ka kyntu ïa ka Sorkar Jylla ban pynkhlaiñ ïa ki bor pahara ha ka thaiñ da kaba buh ïa ki khyrdop talasi mynder ne ki Infiltration Check Post kiba khlaiñ ha ka thaiñ Sonapyrdi khnang ba nangne shakhmat ki mynder na ka ri Bangladesh kin ym ïohlad shuh ban wan rung tuh sha India lyngba ki shnong kiba don ha ki khappud namarba ki shipai BSF kiba don hajan jingkieng Sonapyrdi kim lah ban tehlakam ïa kane ka jingwan rung kyrthep ki mynderi ri.
