Shillong, Nailar, 22: Ka Federation of Khasi Jaiñtia & Garo People (FKJGP) Seng Kmie ha ka sngi baar ka la phah leh tes ha Pastuer Institute, Shillong ia ka um ba la shim nuksa na ki shnong bapher bapher bad na ki kor um sorkari kiba kiba don hapoh ka jylli jong ka Sor Shillong ia kiba la sam da ka tnat Public Health Engineering (PHE) bad ka Shillong Municipal Board (SMB).
Ia ka um, la rah sha ka tnat Food & Safety kaba don ha Pastuer Institute, ha Lawmali ban phah leh tes khnang ban pynthikna la ka um ka long ne em kaba bit ba ki paidbah kin pyndonkam kum ka umbam umdih bad ha ka shet ka tiew, ha ka sum ka sait.
U President ka seng u Bah Dundee C. Khongsit ha ka jingiakren bad ki lad pathai khubor, u la iathuh ba ka jingphah leh tes ia ka um hadien ba la shim nuksa na ki shnong bapher bapher ka long hadien ba ka seng ka la ioh ia ka jingujor na ki paidbah nongshong shnong kiba la pynpaw ba ki don ka jingsngewsyier, ka jingartatien ban dih ia ka um ba la sam da ka tnat PHE bad ka Municipal.
U la iathuh ruh ba ka jingphah leh tes ia ka um kan sa long ruh wat ha ki District bapher bapher jong ka Jylla khnang ban pynthikna ba ka umbam umdih jong ki paidbah ka dei ban long kaba shngaiñ.
U la ong ka ka jingphah leh tes ka long ar bynta, khnang ban lap ba ka um ba la sam da ka tnat PHE bad ka Municipal ka don ne em ia ki khñiang jingpang bad ka jingbun than ka Iron.
“Lada ka jingleh tes ka lap ba ka um kam long satia kaba bit ban pyndonkam, ka Sorkar ka dei ban shim ia ka jingkitkhlieh bad lada ka sorkar kam leh katkum ka jingdonkam, ka seng kam banse ban shim da kawei pat ka sienjam,” u la ong.
Shuh shuh u la ong ruh ba ka seng ka dawa ia ka Sorkar Jylla ba kan thaw noh da ka Water Policy.
