Shillong, Nailar, 22: Ki Pulit ka Jylla ki la ioh kurup ia ka Register ba la thoh ia ki kyrteng bad ia ki jingtip kiba bniah jong ki dkhot ba la pynrung ha ka National Liberation Council of Nongkyndong (NLCN), ka kynhun kieng atiar ba dang shu seng thymmai.
Ka tyllong khubor ba la iohlum ha ka lah sngi U Blei, ka la iathuh ba ki Pulit ki la ioh kurup ia ki kot ki sla ba donkam bad kynthup ia ka Register kaba don ia ki kyrteng ba palat 100 ngut ki briew ba la pynrung kum ki dkhot ha kane ka kynhun hadien ka jingiohkem ia uwei na ki nongialam jong kane ka kynhun.
Ki Pulit ki la pynlong ruh ka jingkhynra ha ki bynta bapher bapher jong ka rilum Khasi bad Jaiñtia ban ioh kem ia ki dkhot jong kane ka kynhun kiba la paw kyrteng ha ka Register.
Haduh 11 ngut ki dkhot kynthup ruh 4 ngut ki nongialam jong ka NLCN ki la shah kem ha ki Pulit. Ia kine, la wanrah sha nongbah Shillong bad la tian bishar ha Kashari, kaba la aibor ia ki Pulit ban set ha along ki Pulit 8-10 sngi na ka bynta ban pynlong shuh shuh ia ka jingtohkit kaba bniah. Arngut ki dkhot kynthup ia kawei ka kynthei ki la kem pang bad don mynta ha Hospital.
Ha ka taiew baladep, hynñiew ngut ki dkhot jong kane ka kynhun ki la shah kem na ki bynta bapher bapher jong ka East Khasi Hills kynthup ia uwei u khynnah skul uba dang pule ia ka Class-X. Kine kiba la shah kem ki kynthup ia saw ngut ki nongialam, kata u self-styled Chairman, u Commander-In-Chief, u General Secretary bad ki Area Commander jong ka West Khasi Hills, u Area Commander jong ka Jaiñtia Hills, nongpynrung dkhot bad nongbuh jingtip bad lai ngut ki dkhot.
Ka NLCN ka la iateh lok bad kiwei pat ki kynhun kieng atiar na ka jylla Nagaland bad thmu ruh ban phah hikai pyntbit ia ki dkhot ba nyngkong eh sha Nagaland ha ka 17 tarik, Nailar, 2023. Ia ka NLCN la pynkha ha Eastern Range (Khasi bad Jaiñtia Hills) da ki samla na rilum Khasi-Jaiñtia da ka jingthmu ban hiar thma ia ka Sorkar bad ban leh ia ki kam pyntriem da kaba thied ia ki tiar siat bad ki tiar pynbthei, ban dawa pisa, ban pynrung dkhot, ban phah hikai pyntbit ia ki dkhot, ban thaw ia ki ktem riehtngen bad ban iasylla ban leh ia ki kam pyntriem.
Ki Pulit ki la rejistar da ka criminal case ha Crime Branch Police Station, Eastern Range, Shillong, hapoh ki kyndon aiñ bapher bapher jong ka Indian Penal Code (IPC) bad ka Unlawful Activities (Prevention) Act (UAPA). Ki Pulit kiba la pynlong ia ka jingkhynra ia ki jaka sah jong ki nongialam kane ka kynhun ki la ioh kurup ia ki tiar ba donkam bad ia ki mobile phone kynthup ruh ia ki kot ba donkam.
Ka NLCN ka la buh thong ban pynrung dkhot palat 1500 ngut, ia kiba yn phah hikai pyntbit sha ka jylla Nagaland. Haduh mynta, ka NLCN ka ladep pynrung palat 100 ngut ki dkhot.
Ia ka NLCN la pynkha ha u snem baladep hynrei ka jingpynrung dkhot ka la sdang naduh ar bnai mynshwa. Ka thong jong ka NLCN ka long ban pynkhlaiñ ia ka bor treikam palat ban ia ka HNLC kaba la shah kheiñ be-aiñ.
