Khliehriat, Nailar 23: Ki Pulit jong ka East Jaintia Hills District ha ka sngi baar ki la iohkem ia u Issei Sungoh na iing sah jong u na Dkhiah East, Lad Sutnga halor ka jingdonkti ban pynngop ia ki khynnah bad ia uwei u samla lud lyngba ka Facebook ban leit shim ia ka pisa kaba u la dawa na uwei u briew uba shong basah ha kawei ka shnong kaba hap hapoh ka jylli treikam jong ka Lumshnong Police Station.
U kyrwoh khubor ba la phah sha ki lad pathai khubor ha ka sngi balang da u Superintendent of Police ka East Jaiñtia Hills u Jagpal Singh Dhanoa, la iathuh, ‘ha ka 19 tarik mynta u bnai ki Pulit ki la ioh jingtip na uwei u nongshong shnong uba sah hapoh ka jylli treikam jong ka Lumshnong Police Station ba u la ioh ia kawei ka phone call na uwei u briew u bym lah satia ban ithuh uba la dawa pisa bad byrngem ruh ban leh eiei pyrshah ia u lymda u siew ia ka pisa ba la shah dawa.”
“Ha ka 21 tarik mynta u bnai ki Pulit ki la pynlong ka jingbuddien ia u nongshah dawa pisa bad ha ka por kumba 3 baje eiei, katba u dang pynieng ia ka kali ha Dosti Hotel, Ladrymbai, arngut ki briew ki la rung jubor hapoh ka kali jong u. Ha kum kane ka por, ki Pulit kiba la ap shrip lypa ki la iohbat ia kine ki argnut ki briew,” la iathuh u SP.
Ia kiba la shah kem la ithuh kyrteng kum u Daruis Pakem, 19 snem ka rta na ka shnong Moolaitbri Sumer, katba arngut kiwei pat kiba la shah kem ki dang dei tang ki khynnah rit kiba dang hapoh 18 snem ka rta.
U SP u la iathuh, ha ka jingtohkit, kine kiba la shah kem ha ki Pulit ki la phla ba ki shu pynlum ia ka pisa ha ka kyrteng jong uwei briew uba ki shu ithuh paralok lyngba ka Facebook.
Ki Pulit ki la kynnoh ruh ba dei ma u, uba la telephone ia uba la shah dawa pisa bad la iathuh ruh ba u Issei Sungoh u la pyniadei paralok bad ki arngut kiba la shah kem lyngba ka Facebook bad bthah ruh ia ki ban leit shim ia ka pisa kaba u la dawa na u nongshah dawa pisa.
U SP u la iathuh shuh shuh ba u Issei Sungoh u dei uba la shah kem teng ha ki Pulit jong ka East Jaiñtia Hills halor ka jingdonkti ban pynbthei ia u Bomb IED ha Khliehriat Police Reserve ha u snem 2021 bad u la lait na along hadien ba u la ioh jamin na ka Ingbishar.
Halor kane ka jingjia, ki Pulit ki la register case ha Lumshnong Police Station bad pynngat hapoh ka Section 386/120-B jong ka Indian Penal Code (IPC) bad ka jingtohkit mynta ka dang iaid shakhmat.
