Shillong, ïaïong 29: Ka Shillong Traffic Police (STP) kaba la pynlong ia ka jingtalasi ia ki kali bad ki thuk thuk ar shaka naduh ka 22 tarik haduh ka 28 tarik, Iaiong, 2024 ha kylleng ki bynta jong ka Sor Shillong ka la iohlum pisa na ka jingdain kuna kaba kot T.6,78,00 hajar namar ka jingbun jong ki briew kiba pynkheiñ ia ki kyndon jong ka aiñ ñiah kali lane ka Motor Vehicle Act.
U Superintendent of Police ka East Khasi Hills Rituraj Ravi ha u kyrwoh ba la phah sha ki lad pathai khubor ha ka Lah Sngi U Blei u la pyntip ba ha kine ki hynñiew sngi ba ki Pulit ki la pynlong ia ka jingtalasi kali, ki la lap ba ki don haduh 684 tylli ki jingpynkheiñ ia ki kyndon ñiah kali, kata, kum ka jingñiah kali ha ka por ba la buaid khawyiang, ka jingpyndait ia ki Modified Exhaust Pipes ha ki thuk thuk bad kiwei kiwei.
Ka Shillong Traffic Police (STP) ka la kyrpad ruh ia ki paidbah ba kin long kiba phikir bha haba ki ñiah kali bad ban bud pyrkhing ia ki kyndon jong ka aiñ.
U SP u la pyntip ba ka tnat Pulit kan sa nang iai bteng ban pynlong ia ka jingtalasi ia ki kali bad ia ki thuk thuk ar shaka khnang ban pynthikna ba ka jingñiah kali bad thuk thuk long kaba shngaiñ ha ki surok.
