Shillong, ïaïong 29: Ka Hynniewtrep Youths Council (HYC) ha ka Lah Sngi u Blei ka la dawa ia ka Sorkar Jylla ban pynkynriah beit thik tang ia ki 195 tylli ki longïing sha ki Quarter ba la shna da ka Sorkar Jylla, namar katkum ka jinglap jong ka seng lyngba ka jubab RTI ba la ioh pdiang na ka Shillong Municipal Board (SBM) ki 147 tylli ki longïing kim dei satia kiba trei ha ki tnat treikam bapher bapher jong ka Sorkar.
Kane ka jingdawa jong ka seng ka long hadien ba ka Sorkar Jylla ka la rai ban shong ia ka jingialang kaba khatduh bad ki nongmihkhmat jong ka Harijan Panchayat Committee (HYC) ha ka 7 tarik, Jymmang, 2024 ha kaba iadei bad ka jingpynkynriah ia ki briew kiba sah ha Them Iewmawlong.
Ha ka jingiakren bad ki lad pathai khubor, u President jong ka Hynniewtrep Youths Council Bah Roy Kupar Synrem u la iathuh ba wat u Symbud Myntri Rangbah ka Jylla Bah Prestone Tynsong uba dei ruh u Chairman jong ka High Level Committee ruh u dang pyrkhat ba ki 342 tylli ki longing ha Them Iewmawlong ki dei ki nongtrei jong ka Municipal.
“Ka jingiakynduh jong ngi ia u Symbud Myntri Rangbah ka long ba ka Sorkar na ka por sha ka por ka pynmih ia ito i kyntien ba ong, ‘342 tylli ki longing’ yn sa pynkynriah na Them Iewmawlong sha kano kano ka jaka ba ka Sorkar ka ladep ban mang kyrpang bad yn shna ruh ia ki jaka sah ban ai sha kine ki 342 tylli ki longiing,” ong u Bah Synrem.
“Ka Seng naduh kaba sdang ka ieng halor ka nongrim ba ka Sorkar ka lah ban jaka sah ne ki Quarter ia ki nongtrei jong ka ngim don jingeh, hynrei ngi la pynpaw naduh kaba sdang, ba kito ki briew kiba sah ha Them Iewmawlong ki bym dei ki nongtrei jong ka Sorkar, ka Sorkar kam dei ban dei ban ai ia ka jaka, namarkata, kan long be-aiñ,” la ong u Bah Synrem.
U la iathuh katkum ka jubab RTI ba la ioh na ka Shillong Municipal Board, ka pynpaw ba ki don tang 195 tylli ki longiing kiba trei hapoh ka Municipal bad ha kiwei kiwei ki tnat treikam jong ka Sorkar katba 147 tylli kiwei pat ki dei kiba shu trei Security Guard, ki nongshong dukan, ki nongtrei nongsngewbha, ki nongialam niam bad ki bym dei satia ki nongtrei hapoh ki tnat treikam jong ka Sorkar.
“Kaba lyngngoh ka long ba ynda la iakren bad u Symbud Myntri Rangbah u pynpaw ia ka jingsngew lynngoh ba kine ki 342 tylli ki longiing ki dei ki nongtrei jong ka Municipal bad ha kiwei kiwei ki tnat treikam ka Sorkar. Haba ngi pynpaw ia ka RTI ba la ioh na ka Municipal u la pynpaw ia ka jingsngew lynngoh namarba katkum ka Affidavit ba ka Shillong Municipal Board ka la phah sha ka Ingbishar High Court ba ki 342 tylli ki longing ki dei ki nongtrei jong ka Municipal,” la iathuh u nongialam ka HYC.
“Ka jingkylli ka long mano ba thok mynta,” la buh jingkylli u Bah Synrem.
“Katkum ka RTI ba ngi pan na ka Municipal bun na ki Colunm ba ki shu ieh suda bad kim iathuh ba ki (342 tylli ki longing ki trei haei haei), don pat kiba la thoh Private Service, don kiba la thoh Religious and Social Worker. Kane ka mut ba kim dei ki nongtrei jong ka Sorkar. Lada ka Municipal, hakhmat u Symbud Myntri Rangbah bad hakhmat ka Ingbishar ka ong ba ki 342 tylli ki longing ki dei ki nongtrei jong ka Sorkar katba ha ngi pat ki jubab ba ki 147 na ki 342 tylli kim dei satia ki nongtrei sorkar.,” la iathuh shuh shuh u nongialam Seng.
“Ngi la kren da kaba shai lyngba ka jingthoh lada ai jaka ia kiba shu shong thap ngin ym ailad daleilei ruh,” la maham une u nongialam ka HYC.
U la iathuh ba u Symbud Myntri Rangbah un sa khot jingialang ia ki ophisar jong ka Shillong Municipal Board bad ia ka tnat Pynroi Sor ban pan jingpynshai ba haei ka bakla, la ka bakla ka Affidavit ba la ai jubab da ka Municipal hapoh ka Ingbishar lane ka bakla ka RTI ba ka Municipal ka ai jubab sha ka Seng.
Shuh shuh u la iathuh ba ka Seng ka la dawa hakhmat u Symbud Myntri Rangbah nangne shakhmat lada lait kam hapoh ka Shillong Municipal Board dei ban khot da ka Advertisement.
