Shillong, K’lyngkot, 11: Ka Khun Hynñiewtrep National Awakening Movement (KHNAM) ha ka sngi Palei ka la ïai pynsngew ïa ka jingdawa sha ka Khasi Hills Autonomous District Council (KHADC) ban pynbeit thymmai noh mardor ïa ka AD Rules, kaba ailad ïa kiwei pat ki jaidbynriew ki bym dei ki Khasi ban ïashim bynta ha ka elekshon jong ka District Council.
Ha ka jingïakren bad ki lad pathai khubor hadien ba la aiti ïa ka dorkhas sha u CEM ka KHADC Bah Pynïaid Sing Syiem, u working president jong ka KHNAM Bah Thomas Passah u la ong, ka party ka la ïai pynsngew ïa kane ka jingdawa ban pynbeit thymmai noh ïa ka Rule 128 (1) jong ka Assam and Meghalaya Autonomous Districts (Constitution of District Councils) Rules, 1951, kaba kdew shai, “baroh ki nongshong shnong ka ri India kiba la kynjoh ïa ka rta kaba 18 snem ki lah ban ïakhun, ban long ki nongjied ha ka elekshon District Council”.
U la ong ba ka party ka la ai jingmut ba la donkam ban pynrung ïa ka kyntien “dkhot jong ka jaidbynriew riewlum Khasi- ban ïashim bynta ha ka elekshon jong ka KHADC.
Ka KHNAM ha ka shithi ka la ong lada ailad ïa ki bym dei ki Khasi ban ïashim bynta ha ka elekshon, khlempep kan pynïap noh ïa ka jingmut ban don ïa ka Autonomous District Council katkum ki kyndon jong ka Khyrnit Baphra jong ka riti Synshar ka Ri India.
Ka seng ka la ong, dei namar kane, ki bym dei ki reiwlum ki la shah jied kum ki dkhot jong ka Garo Hills Autonomous District Council (GHADC) bad kane ka la wanrah ka jingpyrshah kaba jur na ki jaidbynriew Garo.
Haba kylli, u Bah Passah u la ong ba u CEM u la kular ba un sa shimkhia ïa kane ka kam bad ka executive committee
bad u Deputy Chief Minister in-charge District Council Affairs (DCA) ban wanrah ïa ki jingpynbeit thymai hapoh ka AD Rules.
