Shillong, K’Lyngkot, 11: Ka Akhil Bharatiya Vidyarthi Parishad (ABVP) Meghalaya ha ka sngi Palei ka la dawa ban pynsangeh noh mardor ïa ka jingthungkam Assistant Teacher ha ki Government Lower Primary Schools hapoh ka Dadenggre Subdivision, West Garo Hills District khnang ban ailad ïa ka jingtohkit halor ka jingkynnoh ba ka don ka jingbym ryntih ha ka rukom thungkam.
Ha ka shithi ba la phah sha u Myntri Rangbah Conrad K Sangma, u State President ka ABVP Meghalaya u Tengku M Marak u la ong ba ka jingpynbna dang shen ïa ka resol da ka tnat Pule Puthi na ka bynta ka post Assistant Teacher ha ki Government Lower Primary Schools hapoh ka Dadanggre Subdivision na ka bynta kiba la pyndep ïa ka exam MTET khamtam ïa kiba dei na ka Unreserved Category ka la pynmih ïa u dak jingkylli uba heh namarba ym don riewlum ba la paw ha ka kyrteng thup UR Category.
Ïa ka result la pynbna ha ka 10 tarik mynta u bnai.
“(Namarkata) ka Sorkar ka dei ban pynsangeh shwa mardor ïa kane ka jingthungkam. Dei ban thung da ka jingtohkit kaba thikna ban pynpaw ïa ka daw ba shongnia halor kane ka jingpynmih result,” la dawa ka AVBP.
Ki nongïalam ka AVBP ki la buh ruh san tylli ki jingkylli bad dawa ruh ïa ka tnat Pule Puthi ban jubab.
U la ong, “hato ym don seh ki hymmen shynrang bad ki para kynthei riewlum kiba kotbor ha kaba kim shym la rung satia wat ha ka thup UR Category? Kumno ba tang kawei ka jaidbynriew kan ïoh lut haduh 33 ki Seat ha ka thup UR category na ki 34 tylli? Hato ym don shuh kiwei kiewi ki jaidbynriew na ka thaiñ kiba la nang la stad kiba lah ban ïoh ïa kine ki post? Ka tnat Pule Puthi jong kato ka District ka la pyndonkam ïa ki lad ki lynti ban pynnang pynstad tang ïa kawei ka jaidbynriew? Mano ba donkti ban wanrah ïa ka jingïaphiah ha ka pule puthi ba tang kawei ka jaidbynriew ka long kaba tbit bad katba kiwei pat ki jaidbynriew pat kim kotbor eiei.?
U la ïaiban ba ka ABVPP ka pynrem jur bad dawa ban thung ïa ka jingtohkit bad ban pynïoh ïa ka hok jong ki riewlum ba dei ïoh ban ïoh ka kam.
