Shillong, Nohprah, 04: Namar ka jingbun shaba palat jong ki briew kiba shim kabu ban khrong pisa be-aiñ ha ka kyrteng jong ka seng bad kumjuh ruh namar ka jingbym lah shuh ban register ia ka seng, ki nongialam jong ka Meghalaya Liberation Assocation of Visually Impaired (MLA0VI) ha ka Lah Sngi u Blei ki la pynbna paidbah ba ka jingialang paidbah kaba la long dang shen ka la shim ia ka rai ban pynduh pyndam noh ia kane ka seng naduh kane ka sngi.
Ha ka jingiakren bad ki lad pathai khubor, u President jong ka Seng u Bah Elkin Rynñiaw u la iathuh ba ha ka jaka jong ka Meghalaya Liberation Assocation of Visually Impaired (MLAoVI) la pynkha thymmai da ka National Inclusive Society For Downtrodden Community (NISFDC) ka ban peit ia ka bha ka miat jong ki briew kiba don jingduna ha ka bor iohi jong ki khmat.
U President ka Seng u la maham tyngeh ruh ia ki dkhot ka seng lane ia kino kino kiba shim kabu ban lum pisa ha ka kyrteng jong ka ka Meghalaya Liberation Assocation of Visually Impaired (MLAoVI) ba ka seng hi ka ladep ban pynduh pyndam.
U la pyntip ruh ba ka Seng ka la pynsangeh noh ban die paidbah ia ka Raffle Ticket.
“Namar ka jingkhñium bad ka jingud shaba palat jong ki briew ha kaba iadei bad ka jingdie jong ka seng ia ka Raffle Ticket ban pynmih pisa na ka bynta ki jingdonkam babun jong ka seng bad khamtam eh ha kaba iadei bad ka projek ba ka seng ka la pyntrei ha ka shnong Mawlai Mawtawar, Shillong, ngi la shim ia ka rai ban pynsangeh noh ia ka jingdie ia ki Raffle Ticket,” ong u Bah Rynñiaw.
Katkum ka jingiathuh jong u, ki Raffle Ticket kiba ka seng ka ladep ban die paidbah haduh mynta ki dang long tang kumba 5 percent na kaba la shna.
“Ngi kyrpad ia kito kiba ladep thied ia ki Raffle Ticket, ba kin ym sngew eiei halor kane ka jingpynsangeh jong ngi bad ngi kloi ruh ban pynphai ia ka pisa kaba ki paidbah ki ladep thied bad ngi long ruh kiba pdiang kylluid mynsiem lada ki don kiba kloi ban shu noh synñiang ia ka pisa jong ka Raffle Ticket sha ka seng,” la ong u Bah Rynñiaw.
