Shillong, Nohprah, 04: Kum shi bynta ban ialap ia ka jingsniew jong u drok khamtam na ka jingngop jong ki khun samla ha ka jingkyrni ban dih ia u drok, ka United Democratic Party (UDP) Youth Wing, Shillong City ka la pynlong da ka lympung ialehkai football kaba la tip kum ka 1st knockout football tournament 2023, kaba don ruh ia ka phang pdeng, kaba ong, “United against drugs, deny drugs embrace life”.
Ia kane ka lympung ialehkai ba la pynlong ha madan jong ka MFA, la sdang naduh mynta ka lah sngi U Blei bad yn sa pynkut ha ka 16 tarik mynta u bnai.
Ha ka sngi sdang jong kane ka lympung ialehkai la ai jingpynshai halor ka jingsniew jong u drok da u Superintendent of Police (City), East Khasi Hills District u Bah Vivek Syiem uba la long kum u resource person ryngkat ka jingdonlang jong u President ka UDP u Bah Metbah Lyngdoh uba la long kum u kongsan bad kiwei kiwei.
