Shillong, Nohprah, 04: U Myntri Rangbah ka Jylla u Conrad Kongkal Sangma u la ong ba Sorkar kan kyrshan borbah ia ki nongrep jong kane ka jylla ha kaba pynmih ia ki marrep bad kumjuh ruh ban weng ia ki jingeh ba ki nongrep ki mad ha kaba iadei bad ka rep ka riang.
Ia kane u Myntri Rangbah u la pynpaw haba kren ha ka dorbarbah jong ki nongrep lane ka Meghalaya Farmers’ Parliament kaba la long ha State Convention Centre, Shillong.
Ha kane ka sngi, u Myntri Rangbah u la pyllait paidbah ruh ia ka Regeneration Meghalaya Project Program.
Lyngba kane ka dorbarbah, ka ban sa kut ha ka sngi baar ka thong jong ka Sorkar ka long ban plie lad ia ki nongrep na kylleng ka jylla ba kin iasam ia ki jingtip bad ban sngap ruh ia ki jingeh ba ki iakynduh ha ka rep ka riang.
Ha kane ka dorbarbah, la iashim bynta lang da ka Myntri jong ka Rep ka Riang ka Sorkar Jylla ka Dr. Ampareen Lyngdoh, u Myntri ka tnat Animal Husbandry and Veterinary Department u Bah Alexander Laloo Hek, ka Secretary jong ka tnat ka Rep ka Riang ka Kong Isawanda Laloo bad ki nongrep na kylleng ka jylla.
