Shillong, Lber 06: Ka tnat Social Welfare jong ka Sorkar Jylla ka la pan jaka na ki Dorbar Shnong kiba don ha kylleng ka jylla khnang ba ka Sorkar Jylla kan dup lah ban tei ia ki Rehabilitation Centre ban ai jingsumar ia ki samla kiba la shah teh mraw ha u drok.
U Myntri uba khmih ia ka tnat Social Welfare Bah Paul Lyngdoh ha ka jingiakren bad ki lad pathai khubor ha ka sngi Balang u la ong, ki Rehabilitation Centre kiba la peit hi da ka Sorkar ia mynta ki don hynriew tylli bad ki don ruh ki Foundation ba la pyniaid da ki kynhun shimet kiba la kyrshan jingiarap pisa da ka tnat Social Welfare.
U la iathuh ruh ba ka tnat Social Welfare da ka jingiatreilang bad ka Mawlai Town Dorbar (MTD) kan sa tei ia ka Rehabilitation Centre ha ka shnong Mawlai ban ai jingsumar ia ki samla kiba la kut jingmut ban bthat noh ia u kynjri ba ki la shah teh mraw ha u drok.
“Ngi kyntu ruh ia kiwei kiwei ki Dorbar Shnong ba kin sngewthuh ia kane ka jingeh da kaba ki ai jaka ne ai khyndew khnang ba ngin dup lah ban shna noh ia ki Rehabilitation Centre,” ong u Bah Paul.“Ha kaba iadei bad ka sohkhliang kaba kiba bun ki ong ba kam bit ban shna ia ki Rehabilitation Centre hapoh ki shnong ki thaw, hynrei ki Dorbar Shnong ki dei ban sngewthuh pat ba kine ki jingeh, kim jia tang hapoh ki san ne hynriew tylli ki shnong hynrei ka dei kaba la saphriang ha baroh kawei ka jylla. Ngi donkam bha ia ki Dorbar Shnong ban ai jingkyrshan ia ka Sorkar bad ngin dup lah ban ai jingiarap ia ki samla kiba la ngop ha u drok,” la ong u Myntrt ka tnat Social Welfare.
