Shillong, Lber 7: Ka Khasi Students Union (KSU)Laban Circle ha ka sngi Balang ka la ujor ha u Chairman jong ka Meghalaya Energy Corporation Limited (MeECL) bad ha u Director jong ka Meghalaya Power Distribution Corporation Limited (MePDCL) ka tnat kaba peit ia ka jingsam bording.
Ha ka dorkhas ka la kynnoh ba ki briew kiba sah ha Maxwelton Estate kaba hap hapoh ka jingpeit jingkhmih jong ka Dorbar Shnong Kench’s Trace, Oxford, Rilbong (KOR) ki ioh ia ka bording da kaba shu leh tuh bad shu ring bording na ki briew kiba don ia ki Meter.
Ka seng ka la pynpaw ruh ia ka jinglynngoh ba kumno kine ki briew ki ioh ban ring bording haba kim don ia kino kino ki kot ki sla kiba biang bad wat ka Dorbar Shnong KOR ruh kam shym ithuh bad ai NoC ia ki.
“Ki riewpaidbah shuwa ban tan bording ha ki thliew iing jong ki, ki hap ban pynshisha ia ka jinglong trai ia ka khyndew ne ia ka iing kaba ki sah. Hynrei kaba lyngngoh ka long ba baroh kine ki briew ba sah beaiñ ha kane ka jaka ki ioh ban ring bording bad kumno na ka liang ki bor pyniaid kim shym la jurip bad ki shu sngap jar jar baroh shikatta. Kane ka jingleh jong ka MeECL lehse ka lah ban long kawei na ki dawbah ba ka tnad ka don hapdeng ka jingkyrduh pisa,” la kynthoh ka MeECL.
Ka Seng ka la ban jur ia ka MeECL ban phah jurip mardor ia ki ing sah ha Maxwelton Estate bad ban khmih bniah ia ka jingring bording tuh bad dawa ruh ba dei ban ot mardor ia ka bording bad ban pynshitom ia ki katkum ka aiñ.
Ka Seng ka la dawa ruh ba ka MeECL ka dei ban jubab da ka jingthoh sha ka seng halor ka jingioh tan bording da ki ki briew kiba sah beaiñ ha Maxwelton Estate.
