Shillong, ïaïong, 16: Ka kynhun ki samla wadkam ha ka sngi baar ki la iakynduh ia ka Secretary jong ka Central Recruitment Board (CRB) ka tnat Pulit ka Mary TG Sangma ha PTS, Mawlai Mawroh ban pan jingpynshai halor ka Revised Guidelines ba la pynmih da ka tnat ha kaba iadei bad ka rta rungkam ha ka tnat Pulit.
Kane ka kynhun ki samla ba la lamkhmat da ka nongtrei mon sngewbha ka samla Barilang Pyngrope ki pynpaw ba ki kwah ba ka rta rungkam hapoh ka tnat Pulit dei ban pynshong nongrim katkum ka Office Memorandum (OM) jong u snem 2022.
Katkum ka Office Memorandum (OM) jong u snem 2022, ka Sorkar ka la pynkiew ia ka rta rungkam na ka 27 snem sha ka 32 snem bad na ka 32 snem sha ka 37 na ka bynta ki Schedule Tribes, na ka bynta ka jingpynrungkam ia ki nongaplai kam ha ki kam hapoh ki tnat treikam bapher bapher jong ka Sorkar Jylla.
Hynrei ka tnat Pulit ha ka jingpyllait ia ka Advertisement ha ka 6 tarik Lber, ka la kdew ba ha ka jingpynrungkam yn sa leh katkum ka Revised Uniform Guidelines na ka bynta ka jingthungkam Pulit ha ka tnat Pulit jong ka Jylla Meghalaya ba la pynmih ha ka 1 tarik, Nohprah, 2023.
Katkum kane ka Revised Guidelines, ka rta rungkam la buh na ka bynta ka post Unarmed Branch (UB) Sub Inspector ka long 21 snem haduh 27 snem kat haduh ka 1 tarik, Kyllalyngkot, 2024 katba na ka bynta ka post UB Constable kum ki nongñiah kali, Fireman, MPRO Operators bad kiwei kiwei ka rta rungkam ka dei ban long naduh 18 snem haduh 21 snem. La pynjlan ia ka rta rungkam haduh san snem na ka bynta ki nongthep kam kiba dei na ki ST/SC/OST.
Ha ka jingiakren bad ki lad pathai khubor hadien ka jingiakynduh ia ka Secretary jong ka CRB, ka samla Barilang Pyngrope ka la iathuh ba la pyntip ba ka CRB kam dei satia ka tnat kaba lah ban pynmih ia ka jingpynbeit ha kaba iadei bad ka rta rungkam.
Ka la iathuh ba la bthah ban leit iakynduh ia ki bor ba dei peit jong ka tnat Personnel ka Sorkar Jylla ban dawa ia ka jingpynbeit halor ka Revised Guidelines.
Katkum ka jingong jong ka, ka tnat Pulit ka la shu pynbeit kynsan kynsan ia ka rta rungkam khlem da pynmih ia ka jingpynbna kaba thymmai na ka tnat Personnel.
Ki post kiba lait hapoh ka tnat Pulit ki long 2968 tylli, ba kynthup 76 (UB Sub Inspector), 720 (Unarmed Branch Constable), 195 (Fireman), 53 (Driver Fireman), 26 (Mechanic), 205 (MPRO operator) 56 (Signal/BN operator), 1494 (Armed Branch Constable/ Battalion Constable/MPRO GD/Constable Handyman) bad 143 (Driver Constable).
