Shillong, ïaïong, 16: Ki thylliej ding barhem ha ka sngi baar ki la bamduh ia ki ar tylli ki iing ha ka shnong Mawiong Umjapung Nongneng Block-A. Kane ka la jia ha ka por kumba 8:00 baje mynstep.
Katkum ka jingtip ba la iohlum la iathuh ba ka ding ka la sdang shwa na ka iing jong ka Kong Twintina Nongneng bad pur pat sha ka ing kaba don markhap bad ka iing jong ka Kong Risuk Wanshnong.
Baroh ki jingdon jingem ha kine ki ar tylli ki iing ki la kylla dpei bad kaba phylla tang ka Bible kam shym la iingkhong wat tang khyndiat ruh.
Ha ka jingiakren bad ki trai ïng jong kine ki ar tylli ki la iathuh ba ka jingpluh jong ka ding ka la lah ban dei na ka jingkem ding u Metre Box.
Ha kane ka jingjia, ym shym la don mano mano ruh ba mynsaw hynrei lait noh tang ka jingjulor jong ki jingdon jingem.
Ka Kong Twintina bad ka Kong Risuk ki la kyrpad ia ki bor Sorkar ba iarap lem ia ki ha kum kane ka jingjia ba sngewsih.
U Rangbah Shnong ka Mawiong Umjapung u Bah A. Kharkongor u la ong tang shu ioh jingtip ia kane ka jingjia na ka liang jong ki nongkitkam ka Dorbar Shnong ki la leit marmar sha kane ka jaka ban iarap ia kine ki lanot kiba la mad ia kane ka jingjia ba sngewsih.
U la ai khublei ruh ia ki nongtrei jong ka tnat Fire and Emergency Services (F&ES) kiba la poi biang por ban pynlip noh ia ka ding shwa ba kan pur shuh shuh sa sha kiwei pat ki iing kiba don markhap.
Na ka liang jong ki Pulit tang shu ioh jingtip ki la leit ban pynlong ia ka jingtohkit halor kane ka jingjia.
