PANMAP U DR. NALIN MEHTA NA KA HYC
Shillong, K’lyngkot 31: Ki nongialam jong ka Hynñiewtrep Youths Council (HYC) kiba la leit iakren bad u Director ka NEIGRIHMS Hospital, u Dr. Nalin Mehta ki la mih jyndat na ka jingialang hadien ba ki la kynnoh ba une u khlieh nongpeit jong ka NEIGRIHMS Hopsital u la kren ibein bad khein ia ki kum ki khynnah surok kiba kwah ban thaw jingkulmar.
Katkum ka jingiathuh jong u President ka HYC u Bah Roy Kupar Synrem ka seng ka la leit iakynduh ia u Dr. Mehta ka long hadien ba u la phah ktien sha ka seng ban iakynduh mynta ka sngi Balang ban iakren halor ka jingdawa hadien ba ka seng ka la ai por hapoh 10 sngi ban pynurlong ia ki jingdawa.
Ha ka 22 tarik mynta u bnai, ka Seng ka la phah da ka jingthoh sha u Director ka NEIGRIHMS halor ka jingdawa ban pyndam noh mardor ia ka jingthungkam Nursing Officer lyngba ka NORCET kaba ktah ia ki samla thepkam trai jylla bad ba ia ka jingthungkam dei ban pynlong beit da ka NEIGRHIMS.
Ka Seng ka la dawa ruh ba ia ki jingthungkam hapoh ka NEIGRHIMS ym dei satia ban aiti sha ki Agency kiba nabar bad ban pynlong ia ka eksamin thungkam hapoh ka Jylla ym shabar ka jylla. Nalor kata, ka seng ka la dawa ba dei ban aiti ban pyniaid ia ki kam sha ki Outsourcing Agency kiba la tbit na ka jylla ym da kiba nabar jong ka jylla. Ba ia ki kam Contractual ne Contract dei ban ai sha ki trai jylla kiba la biang ia ka kyrdan pule. Ban pyntreikam ia ka one-time absorbtion policy na ka bynta ki Nurse kiba la shah thungkam Contractual Basis. Ba ia ki kam Group-C bad Group-D dei ban mang 80% sha ki trai jylla.
Ka Seng ka la aipor 10 sngi ia u Director ban pynurlong ia kine ki mat jingdawa bad byrngem ruh ban khang tala ia ka Ophis treikam jong ka NEIGRIHMS.
Ki Magistrate bad ki Pulit kiba la ioh jingtip halor kane ka jingjia, ki la wan poi ban tohkit ia ka jingbyrngem jong ka Seng ban khang tala ia ka NEIGRIHMS. Ha ka jingïakren, u President ka HYC u la iathuh ha u Magistrate da kaba kynnoh ba ka jingbitar ki nongialam ka seng ka long ba u Director ka NEIGRIHMS Hospital u la ibein bad kynnoh ruh ba ki dei kiba kwah ban thaw jingkulmar.
Hadien ar kynta ba ki san ngut ki nongialam ka seng ki la ieng ha phyllaw, u Dr. Mehta u la wan mih hi dalade ban pynjem ia ki nongialam ka HYC bad panmap ruh ia kaei kaba u la kren hapoh ka jingialang.
Hadien ka jingïakren sngewthuh jingmut, u Director u la kyntu ia ki ban pynlong biang ia ka jingïakren bad ka seng, hynrei ki nongialam ka HYC ki la pynpaw beit markhmat ba kim kwah shuh ban dang iakren bad u mynta ka sngi hynrei ban phah ktien ha kawei pat ka por ban iakren halor ki jingdawa jong ka seng.
