Shillong, K’lyngkot, 31: Ki samla pule kiba thmu ban applai ia ka Scholarship ne ka baibam ki la ia kynduh ia ka jingeh bakhraw namarba ki hap ban ieng lain da ki kynta tang ban ioh thied ia ka E-Stamp namar ka jingduna ki jaka ban die ia kine ki E-Stamp.
Ka Batesi TV, ha ka sngi Balang ka la sakhi ia ka jjingbun briew ha ophis treikam jong ka Deputy Commissoner jong ka East Khasi Hills District kiba la sdang ban ieng lain naduh ka por 9:00 baje mynstep tang ban ioh kloi wat lada ka ophis ka plie ha ka por 10:00 baje mynstep.
Haba pyrshang ban iakren bad kiba bun ki samla hynrei ki kyntait ban iakren halor kane ka jingeh ba ki iakynduh. Kane ka jingieng lain da ki kynta ka la pynlong ia kiba bun ki samla pule ban duh klass noh bad don ruh kiba la shu phet jyndat.
Haba iakren bad uwei na ki samla u la iathuh naduh ba la pyntreikam ia kane ka E-Stamp ki la ia kynduh jingeh namarba duna palat ki jaka ba die ia kane ka E-Stamp bad kumta u la kyntu ia ka Sorkar ba kan plie lad ban buh bun tylli ki jaka khnang ba kan pynduhnong ia ki samla kiba aplai ia ka Scholarship.
