Shillong, Rymphang, 12: Ka Meghalaya Veterinary Services Association (MVSA) Apex Body, ha ka Emergent Central Executive Committee kaba la long ha ka lah sngi U Blei ka la pynrem jur ia ka jingleh tohmet ki arngut ki shipai Border Security Force (BSF) ia u Dr. Seiboklang Buam uba dei u Officer Incharge jong ka Muktapur Veterinary Dispensary, Amlarem Sub-Division.
Ha ka sngi U Blei, u Dr. Seiboklang Buam uba dei ruh u nongshong shnong jong ka shnong Muktapur, West Jaintia Hills District katba u dang thmu ban leit khwai doh na wah Lakroh hynrei u la shah pakhang lynti hajan ka Lakroh Shiv Mandir, Hawai Tilla ha ki arngut ki shipai BSF kiba la tip kyrteng kum u Rajendra Kumar bad uwei pat u bym shym la lah ban tip kyrteng, ha ka por 12:05 baje nohsngi.
Ka Meghalaya Veterinary Services Association (MVSA) Apex Body ka la mih shakhmat ban pynrem jur ia kane ka jingjia, namarba u Dr. Seiboklang u dei ruh u dkhot jong ka Association.
Ha u kyrwoh ba la phah da u President bad u General Secrertary ka MVSA, Shillong, ki la ong, “ka Association ka la shimkhia bha halor kane ka jingjia, kaba la mih ha ki lad pathai khubor. Ka MVSA ka la shim ia ka rai ban pynsngew sha ki bor bahalor jong ka tnat shipai BSF, Meghalaya Frontier Headquarter halor kane ka jingjia ba sngewsih, kaba la ktah haduh katta katta ia ka jingmut jingpyrkhat jong u (Dr. Seiboklang Buam) dkhot ka Association.”
Ka Association ka la dawa ba ki bor bahalor jong ka tnat shipai BSF ki dei ban panmap ryngkat ka jingkular ba kum kine ki jingjia kin ym jia shuh hadien habud.
Kum ban shu pynkynmaw hangne, arngut ki shipai BSF ba la tip kyrteng kum u Rajendra Kumar bad uwei pat u bym shym la lah ban tip kyrteng la kynnoh ba ki la sloit jubor ia ka sopti bad byrngem siat iap ia u Dr. Seiboklang Buam, ha ka sngi U Blei ha ka por 12:05 baje noh sngi katba u dang thmu ban leit khwai dohkha na wah Lakroh kaba don ha khappud ka ri Bangladesh bad kaba jngai 2 kilomitar na Muktapur na ka surok Muktapur-Jaliakhola kaba hap hapoh u pud u sam jong ka BSF, Border Out Post Hawai Tilla.
Halor kane ka jingjia, u Dr. Seiboklang Buam u la mudui da ka ejahar sha ki Pulit ka Muktapur PPP ha kane kajuh ka sngi.
