Shillong, ïaïong 18: Ka Meghalaya Human Rights Commission (MHRC) ha ka sngi Palei ka la pan jubab na ka Sorkar Jylla halor ka jingshah thang im lai ngut ki briew na ka jylla Assam ha East Garo Hills District ha ka sngi Balang.
U Secretary ka Commission u la bthah ia u Director General of Police (DGP) ka Jylla ba un phah ia ka kaiphod shim kam (Action Taken Report) hapoh shi bnai naduh ba la ioh pdiang ia ka hukum.
Kum ban shu pynkynmaw, lai ngut ki briew ba la suba ba ki dei ki nongtuh kali na ka jylla Assam ki la shah thang im ha ka khlaw kaba don ha East Garo Hills District ha ka step sngi Balang bad ki Pulit ki la ïathuh ba ka la don ka jingsuba ba ka lah ban dei ka kynhun jong ki nongtuh kali kiba la leh ïa kane ka kam bymman.
Arngut na kine kiba la shah thang im ki dei kiba la tip kyrteng kum u Zahidul Islam bad u Jamor Ali.
“Imat kane ka dei ka kam tuh kali bad ka kynhun ki nongtuh,” ong u SP ka East Garo Hills Bah SA Rynjah ha u kyrwoh ba la phah sha ki lad pathai khubor.
U la ïathuh ba u Zahidul Islam u dei uba ju donkti ban tuh kali na Dudhnoi bad Krishnai bad u dei ruh uba don case NBWA pyrshah ïa u ha Krishnai PS. Katba u Jamor Ali u dei uba donkti ban tuh masi bad don case ha Matia PS, Assam.
U SP u la ïathuh ba ha ka sngi Baar ki la ïoh ïa ka jingujor ba shu pyntip ba u Jamor Ali (35snem) ryngkat lang bad u nongñiah u Noor Ahmed bad u Zahidul Islam (25 snem) ki la mih na ka la ïing ha ka janmiet Lah Sngi u Blei ban wan sha Meghalaya.
Ka khubor ïa ka ïathuh kine ki briew na Assam ha ryngkat bad u nongñiah jong ka kali ba ki shim wai, ki la shah pynïap bad shah thang ha Rongmil haduh ba ym lah shuh ban ithuh ia ka durkhmat, kaba jngai kumba 15 kilomitar na Rongjeng, East Garo Hills.
Ïa kine ki metïap ba ladep thang la tep ha kawei ka thliew ha ka thaiñ Rongmil.
