Shillong, ïaïong 18: Ki nongtrei ha ka tnat elekshon ba kynthup naduh ki Returning Officer, ki Assistant Returning Officer, ki Zonal Magistrate, ki Sector Officer, ki Pulit pahara bad kiwei pat ki nongtrei ki la mih lang khrui na madan Polo, Shillong ban leit sha manla ki Polling Station bapher bapher kiba don ha kylleng ki Constituency jong ka East Khasi Hills.
Kine ki nongtrei kin peit ia ka jingiaid beit iaid ryntih ha ka jingiathep Vote ha ka elekshon Lok Sabha ka ban long ha ka Sngi Thohdieng bad sdang naduh ka por 7:00 baje mynstep bad kut haduh ka por 4:00 baje janmiet.
Ka jingñiew ia ki Vote kan long ha ka 4 tarik, Jylliew 2024.
Khnang ban pynthikna ba ki nongpyniaid ia ka elekshon kin poi biang por sha ki Polling Station bad ba kin ym sahkut ha ka dheng kali kaba jur ha nongbah Shillong kaba ju jia manla ka sngi, u Deputy Commissioner (Election) uba long u District Election Officer ula pynbna da ka shuthi tang ia ki skul, ki kolej, ki ITI kiba don ha Shillong.
Katkum u kyrwoh ba la phah da u Chief Electoral Officer ka Jylla u Dr. BDR Tiwari, la sakhi ia ki nongpyniaid elekshon kiba la hap ban shong da ki lieng ha wah Shella ban poi sha ki shnong kiba don ia ki Polling Station ba kham kyndong ba kynthup sha Kalatek A bad B bad sha Kamsing Polling Station kaba hap hapoh ka Amlarem Civil Subdivision.
Shwa kane, ka tnat Election ka la phah ia ki nongtrei ban leit rung sha ki ing ki sem ba don tang ki tymmen ki kro bad kiba duna dkhotmet ba kin thep ia ka vote. Kane ka long ka thong jong ka tnat Election ban ym iehnoh ia ki nongshong shnong kiba dei hok ban ioh thep ia ka vote bakordor ba kin jied ia la u/ka nongmihkhmat sha ka dorbarbah Lok Sabha mynta ka kynti.
