Shillong, Nohprah, 09: Ka Education Cell jong ka Khasi Students Union (KSU) ka la ïakynduh ïa u Myntri ka tnat Pule Puthi u Rakkam A. Sangma ha iing sah jong u ban pynsngew halor ka jingpynslem jong ka Sorkar Jylla ban pyllait ïa ka baibam (Schorlarship) bad halor ka jingmih ki kynrum kynram jong ka eksamin Meghalaya Teachers Eligibility Test (MTET) ba la pynlong da ka Directorate of Educational Research and Training (DERT).
Ka Seng hapoh ka jingïalam jong u Assistant Education Secretary ka KSU CEC u samla Shelkitbok Kharbani ka la aiti ruh ai ka dorkas ha u Myntri.
Na ka liang jong u Sangma u la pynsngew ba ha kaba ïadei bad baibam (Scholarship) ka Sorkar Pdeng kam pat pyllait satia ïa ka pisa hynrei ïa mynta ka pisa ka dang don tang khyndiat ha ka Sorkar Jylla bad ïa kane ruh ka Sorkar Jylla ka la nang pyllait naduh sngi Palei.
U Myntri u la kular ha ka taiew ban wan la khmih lynti ba ka pisa kan poi noh bad ka Sorkar kan ïoh ban pyllait lut sha baroh ki samla pule.
Ka seng ka la kyntu ruh ïa ka tnat kaba dei peit ba kum kine ki jingpynslem ïa ka baibam jong ki samla pule kam dei shuh ban dang ïai jia ha ki snem ki ban wan.
Halor ka kynrum kynram haba ïadei bad ka eksamin MTET kaba la long ha ka 1 tarik mynta u bnai, u Myntri u la pynpaw ba ki jubab ba ki nongiakhun eksamin ki thoh kiba dei hi kin dei beit kumba ki long bad ïa ka Answer Key ba mih bakla bad ba la pynklumar kan ym ktah ïa ki.
U la ong ba ïa ki nongthoh eksamin, lada ki don ka jingbym hun ki lah ban ai da ka jingujor ban phah pynbeit biang ïa ka Answer Script jong ki wat hadien ba la ïoh ïa ka resol bad nalor kata, ki nongïakhun eksamin lada ki dang khuslai ki lah ban thoh da ka aplikeshon sha ka DERT ban pynbeit bad ban pan jingpynshai.
Ka seng ka la pynsngew ruh ba ka jingkynrum kynram ha kaba ïadei bad ka eksamin MTET kam dei shuh ka sien ba nyngkong kumta ka seng ka la kyntu ïa u Myntri ba un pynthikna ba ka dei ban ïaid beit ïaid rynti khnang ba kan nym buh jingartatien ne sah umdum ïa kiba ïakhun ïa kane ka eksamin.
U Myntri ruh u la kular ba ka Sorkar kan sa peit bniah bad kan sa shim ïa ka rai kaba biang khnang ba kan long ka ban pynhun ïa baroh bad kan ïaid beit ïaid ryntih.
