Shillong, Nohprah, 09: Shibnai tam mynshuwa ki Pulit pyniaid kali jong ka Lumdiengjri Traffic Police ki la hap ban maramot dalade hi ia ka surok GS Road ha Lumdiengjri marpyrshah bad ka thanat namarba ka la pynsuhsat ia ka leit ka wan jong ki kali kat haduh ba ka la wanrah ia ka jingdheng kali kaba jur namar ka jingsniew shaba palat jong kane ka surok.
Ka tnat Pulit ka la phah ruh da ka jingthoh sha ka Sorkar Jylla da ka jingkyrpad ban phah maramot noh ia kane ka surok.
Hynrei ka sorkar kam la sngap satia bad ka jingsniew jong kane ka surok mar pyrshah bad ka Lumdiengjri Police Station ka la nang sniew haduh katta kat haduh ba la paw sa ki mawria bad ka jingkhoh jong ka rong na ka jingpei jong ki pipe um.
Ka jingkylli kaba mih mynta ka long, lada hapdeng sor Shillong ka Sorkar kam patiaw ban maramot ia ki surok ba kongsan tam ha ka leit ka wan, katno tam lei lei ia ki surok kiba sniew sha ki shnong nongkyndong.
