Shillong, Nohprah, 09: Ka long ka jingkmen kaba khraw ia ka jylla Meghalaya bad khamtam ia ki nongrep, hadien ba hynriew ngut ki nongrep napoh kane ka jylla Meghalaya ki la shah pynkup burom da ka khusnam “Millionaire Farmer of India Awards 2023” ha ka jingialang kaba la long ha madan PUSA, New Delhi.
Ia kane ka Krishi Jagran Millionaire Farmer of India Awards 2023’, la pynlong ha ka 6 tarik haduh ka 8 tarik mynta u bnai bad ha kine ki lai sngi kine ki hynriew ngut ki nongrep ki la iohlad ruh ban iashim bynta ha ki prokram bapher bapher ba la pynlong ha kine ki sngi.
Kine ki nongrep ki dei na ki bynta bapher bapher jong ka jylla kiba kynthup ia ka Tinash Momin kaba na West Garo Hills, ka Baphira Nongdhar na East Khasi Hills, Springwell Kharmarshra na West Khasi hills, Jelum R. Marak na South Garo Hills, Tanly Lapasam na Jaintia Hills bad Grithilson M. Sangma na East Garo Hills District.
