Shillong, Lber, 23: Kumba 40 ngut ki dkhot jong kiwei kiwei ki party ha ka miet sngi Thohdieng ki la pyniasoh ialade bad ka seng Congress ha ka jingialang kaba la pynlong da ka Mawryngkneng Block Congress Committte ha ka shnong, East Khasi Hills District.
Ia kine ki dkhot ba la pyniasoh thymmai sha ka Congress la pdiang burom da u President jong ka Meghalaya Pradesh Congress Committee (MPCC) Bah Vincent H. Pala uba long ruh u kyrtong jong ka Indian National Congress ban iakhun ia ka elekshon Lok Sabha na Shillong Seat ka ban sa long ha ka 19 tarik, Iaiong.
U Bah Pala haba kren ha kane ka jingialang u la ong, “lada ngi wan ha ka por, ngin wanrah ia ki polisi khamtam eh na ka bynta ki samla. Palat lai klur kiba donkam ha ka shisnem hynrei ki briew jong ngi na ka por sha ka por kim iohkam. Ka Congress ka la trei shitom ban wad jingkheiñ bad ba ki samla jong ngi ki dei ban iohkam.”
U la ong ba ka Congress ka la phaikhmat ruh sha ki longkmie hapoh kane ka jylla bad lada ka Congress ka wan ha ka bor, kan sa wad ia ki lad ki lynti ban iarap ia ki kynthei.
“Nga kyntu ia phi ba phin shim ba kane ka elekshon kam dei tang ka elekshon jong u Bah Pala ne tang ka elekshon jong ka seng Congress. Ka elekshon ka dei ka kam iap kam im. Ka jaidbynriew jong ngi ka dei kaba ngim lah ban phiah da kaba ong une u Khasi, une u Garo bad une u Jaintia hynrei hapoh ka Meghalaya ngi ialong kawei. Lada ia phiah ka ioh ka kot ka ktah, ka pule ka puthi ka ktah bad kumta ter ter,” u la ong.
“Ngin klet ia ka MDC, ngin klet ia ka MLA ngin iatreilang ha ka MP namarba ka ktah ha ka riti ka dustur, ka ktah ia ka kolshor jong ngi,” u la ong bad iathuh, “ha rilum Garo ka la don ka jingkylla namarba ki paralok kiba rim ki la wan phai biang sha ka Congress.
“Ki shongshit ha kato ka por bad ki ong ban pynrem ia ka Congress ba bun ka bamsap hynrei ki la lap mynta ba kane ka sorkar ba mynta ym tang ba ka bamsap hynrei ka bamduh ruh. Nga kyrpad ia phi ban ngin phai biang sha ka Congress bad ngi lah ban shongshit ha ki por baladep hynrei mynta ngin phai biang ban ai jingkyrshan ia ka Congress bad ai jingkyrshan ia nga,” la kyrpad u Bah Pala.
“Ma nga kum u MP nga lah ban don ki jingduna hangne hangtai,” u la bynrap.
“Ka skhim kaba tang 15 klur ban pyndap ia ki 36 tylli ki Constituency kam dei kaba suk bad ong ruh ba mynta ka samoi san snem leiei haduh lai snem ki khlem ai ia ka skhim bad nalor ba la buh ka jingtyrwa wat shi tyngka ruh ym lah ban pyndonkam bad kane kam jia tang ia nga hynrei ia baroh ki MP hapoh ka ri India ki mad kumjuh,” u la bynrap.
