Shillong, Jylliew 09: Ka Kong Bindas Syiem ha ka sngi U Blei ka la phah ia u kyrwoh sha ki tyndong skhor jong ka Sorkar Meghalaya Democratic Alliance (MDA) ba ialam da ka National Peoples Party (NPP) ba ka long kaba kloi ban weng noh ïa ka jingshah thngan kaba khlem pud sngi tang lada ka ioh ia ka jingkular da ka jingthoh na u Myntri Rangbah ka jylla Conrad K Sangma lane u Symbud Myntri Rangbah uba peit ia ka tnat PWD (Roads) ban shna noh mardor ïa ka surok Nongpoh-Umden-Sonapur.
Ha ka jingiakren bad ki lad pathai khubor ka Kong Syiem ka la ong, lada ka Sorkar ka kwah ba kan weng noh ïa ka jingshah thngan ba khlem pud sngi u Symbud Myntri Rangbah ba khmih ïa ka PWD Bah Prestone Tynsong lane u Myntri Rangbah Conrad K Sangma ki dei ban ai da ka jingkular da ka jingthoh ban pyntrei noh ïa kane ka surok kumba nga la dawa
Ka la ong ruh ba ka jingbym pdiang ïa ka jingkular jong u MLA ka Nongpoh Constituency u Bah Mayral Born Syiem bad na u Executive Engineer ka PWD (Roads) Nongpoh Division ka long ba ka kwah beit ba ka jingkular kaba tikna ka dei ban wan na ka kti jong u Symbud Myntri Rangbah ba khmih ia ka tnat PWD ne na u Myntri Rangbah.
“Lada ngam ïoh ia ka jingkular da ka jingthoh na ka kti jong ki, ngan ym ngeit bad ngan ym pdiang da leilei ruh,” ka la ong.
Kum ban shu pynkynmaw, ka Kong Bindas Syiem ka la sdang ia ka jingshah ia ka jingshah thngan ba khlem pud sngi ha ka 6 tarik mynta u bnai hakhmat ka khyrdop Main Secretariat. Tang hapoh khyndiat kynta ki Pulit ki la ialam noh ia ka sha Parking Lot, kaba don hajan ka ophis Additional Secretariat, Shillong ban bteng ia ka jingshah thngan watla u Deputy Commisisoner ka East Khasi Hills District um shym la ai jingbit satia ban pynlong ia kane ka jingiakhih.
Naduh ka sngi nyngkong, la sakhi ia ka jingtuid jong ki kynhun bapher bapher bad ki sengbhalang, kynthup ruh ia u MLA ka Nongpoh Constituency Bah Mayral Born Syiem ba la leit ai mynsiem ia ka Kong Bindas bad kyrpad ruh ia ka ban weng noh ia ka jingshah thngan
Ha ka miet shiteng synnia ka sngi Saitjaiñ, ki Pulit ba la lamkhmat da u Superintendent of Police ka East Khasi Hills u Rituraj Ravi ki la leit sha ka jaka shah thngan jong ka Kong Binda da ka jingthmu ban rah ia ka da ka bor da kaba aidaw ban leit leh ia ka Medical Checkup.
Ia kane ka jingthmu jong ki Pulit la pynpulom noh da ka jingtuklar jong ki paidbah kiba synran ia ka Kong Bindas ha kane ka jingshah thngan.
