Shillong, Jylliew, 04: Hadien 15 snem ba u Bah Vincent H. Pala u la mihkhmat kum u MP na ka Shillong Parliamentary Seat ha kane ka kynti ba mynta hadien ka jingmih pyrthei jong ka Voice of the People Party u la shah pynliem noh ha u Dr. Ricky AJ Syngkon uba la tam kput haduh 3,71,910 vote.
Kum ban shu pyntip hangne ba u Bah Vincent H Pala u la jop nyngkong eh kum u MP jong ka Shillong Parliamentary Seat ka long ha u snem 2009 na ka seng Congress bad u la long ruh u Myntri Khynnah uba khmih ia ka tnad Water Resources bad ka tnat Minority Affairs hapoh ka Sorkar United Progressive Alliance ba la ialam da ka Congress ha Delhi.
Hadien kane, ha u snem 2014 u Bah Vincent H Pala u la shah jied biang kum u MP ha ka sien kaba ar bad kumjuh ruh ha u snem 2019 u la jop ia ka elekshon Lok Sabha ha ka sien ka balai.
Dei tad ha ka election Lok Sabha kaba la long ha u snem 2024 u Bah Pala u la shah pynliem noh ha u kyrtong jong ka Voice of the People Party u Dr. Ricky AJ Syngkon.
