Shillong, Jylliew, 01: Ka jingiakhun pyrshah ia ki jingsniew ba laiphew jait khamtam eh u drok ha ka thaiñ Mawkyrwat ka la tyrha har bad mynta ka kynti ha ka sien ba nyngkong baroh ki Sengbhalang kiba don hapoh ka South West Khasi Hills District, kata, ka KSU, HYC, FKJGP, HITO & HANM ki la iatreilang ryngkat bad ki bor shnong ka Mawkyrwat naduh ka VDP, Seng Samla Shnong, bad Seng Longkmie hapoh ka shatri jong ka Joint Action Committee on Social Organisation (JACSO) da ka jingthmu ban rat dyngkhong syndon ia u drok bad kiwei pat ki jingsniew, da kaba sdang nyngkong na Mawkyrwat.
Hashwa ban pynbna paitbah sha ka pyrthei ia ka jingsdang treikam ka JACSO, ki bor shnong ryngkat ki sengbhalang baroh ha ka sngi Saitjaiñ ki la pynlong ia ka jingkhynra drok bad khynra kyiad ha baroh kawei ka iew Mawkyrwat, hynrei la ioh kurup noh tang ia ki kyiad ba kynthup ia ka kyiad pyrsi bad kyiad phareng, hyrnei ki nongdie drok bad ki nongdih drok ki la phet iap lailum laiwah tang mar ia iohi ia ka jingkhynra.
Hadien ka jingkhynra, la ai jingkren da u Chairman ka JACSO, Bah JF Iawphniaw, u GS ka KSU Mawkyrwat Cirle bad Secretary JACSO, samla Plosbor Kharjahrin, u Vice President ka Seng Samla Shnong Mawkyrwat, Bah Skhembor W. Nongrum, u President ka HANM SWKHD, Bah Lambokstar Marwein bad u President ka HITO SWKHD, Bah Paul Thyrniang.
