Shillong, Jylliew, 01: Ka la don ka jingiam briew ha ka shnong Nongpriang ha ka por ba ki kynhun iarap ki la ioh ban sei ia ki met iap kiba la shah tap tyllep ha ka jingtwa khyndew kaba la ban ia ki ar tylli ki iing ha kane ka shnong. Ka dei ka jingjia kaba pynsngewsih kthang ia ki nongshong shnong baroh namarba ha kajuh ka sngi ki don haduh saw ngut ki nongshong shnong kiba la iap ha kane ka jingshah lynshop ha ka bor mariang.
U nonglum khubor jong ka Batesi Tv uba la leit sha ka shnong Nongpriang, u la ioh ban sakhi ha ryngkat ka jingring dur naduh ba ki kynhun iarap ki la sdang ia ka kam jong ki haduh ba kin da ioh sei ia baroh ki metiap kiba la shah tap tyllep ha ka khyndew kaba rben.
La iohi ha kane ka Video ba ka jingiakhun ban sei ia ki metiap kam long kaba suk, nalor ba ki hap kraid ia ka khyndew tang da ki mohkhiew, la iohi ruh ba ki kynhun iarap ki hap ban pyntyllun ia ki mawbah tang da ka bor met jong ki namarba kim shym la lah ban wanrah ia ki tiar ki tar kiba donkam namar ka jinglong riat palat kane ka shnong.
Ka kynhun jong ka Search and Rescue Team, ka State Disaster Response Force, ki pulit ka Sohra Police Station ha ryngkat ka jingiarap kaba radbah jong ki nongshong shnong, ki la trei shitom thop naduh dang step haduh ka nohphai sngi jong ka sngi thohdieng ka 31 tarik u Jymmang 2024 tad haduh ban da lap ban sei ia baroh ki metiap kiba sahkut shapoh.
Kum ban shu pynkynmaw biang sa shisien ba ha ka step phyrngab jong ka 30 tarik u Jymmang 2024 ha ka por 2 baje eiei, ar tylli ki iing ki la shah tap tyllep ha ka jingtwa khyndew ha ka shnong Nongpriang. Ha kane ka jingjia ki la don saw ngut kiba la duh ei la ka jingim ba kynthup ia u bah Phisar Nongrum bad lai ngut na kajuh ka longiing kata ka kong Benti Riahtam , u lok jong ka u bah Kynmaw Syngai bad u khun jong ka u bah Lumlang Riahtam.
Ha kajuh hi ka step kata ha ka 30 tarik u Jymmang la ioh ban sei ia ka met jong u bah Phisar Nongrum, ha ka step kaba bud kata ka 31 tarik u Jymmang la ioh ban sei sa ia ka met jong u bah Lumlang Riahtam bad khatduh eh shuwa ban dum ka bneng la ioh ban sei sa ia ka met jong ki shi kurim kata u bah Kynmaw Syngai bad ka kong Benti Riahtam, la ioh ban sei ia ka met jong ki kaba don marsyndah ha kajuh ka jaka.
Hadien ba la lah ban sei ia baroh ki metiap, ka la don ka jingia khublei mar kylliang hapdeng ki kynhun iarap jong ka sorkar bad ki nongshong shnong namarba dei lyngba ka jingiatrei shitom lang jong ki nongshong shnong la lah ban pyndep ia kane ka kam.
Kum ka dak ka jingsngewlem halor kane ka jingjia ba sngewsih, ka sorkar ka la pynbna ba kan ai jingiarap 4 lak tyngka marwei sha kiba haijng hasem jong kine kiba iap. Ki la don shibun ki kynhun kiba la pynpaw ka jingsngewlem halor kane ka jingjia kaba sngewsih, na ka liang ka Batesi Tv ruh ngi phah ka jingsngewlem sha kiba haiing hasem jong baroh kito kiba la khlad noh ha kane ka jingjia ka bym poi pyrkhat.
