Shillong, Jymmang, 01: Ka tnat PWD (Roads) ka Sorkar Jylla ka la pan da ka jingthoh na ka Green Tech Foundation (GTC) na ka bynta ban pynpra noh ïa ka jingtei ba la siang dewbilat halor ka Wah Thangsniang, ha ka dong Nongrimbah, Laitumkhrah, Shillong.
U Chairman jong ka Foundation, Bah H. Bansiewdor Nonglang ha ka jingïakren bad u nonglum khubor hadien ka jingïakynduh ïa u Engineer jong ka tnat PWD (Raods) ha ka sngi Balang u la ïathuh ba la ïoh jingtip ba ka jingtei ka dei ka jong ka tnat PWD (Roads) bad katkum ka jingïakren la sngewthuh ka la don ka jingsorjamin hapdeng ka PWD, ka Meghalaya Pollution Control Board, Shillong Municipal Board bad kiwei kiwei ki tnat.
U la ïathuh ba ka Foundation kan sa pynkhreh ban leit aiti da ka jingthoh sha ka tnat PWD (R) lashai ka sngi Palei.
“Kumba ngi la ong naduh kaba sdang ba ngin ym ailad ïa kane ka jingtei bad kum ban pynkynmaw biang ba ka jingtei ka pynkheiñ ïa ka Standing Order ba la pynmih da ka Iingbishar Meghalaya High Court ha u snem 2019 bad ka la pynkhein ïa ka Section 3 Clause A, Clause B jong ka Meghalaya Water Bodies Reservation and Conservation Guidelines 2023. Ka la pynkheiñ ruh ïa ka Solid Waste Management Rules, 2016 bad ïa ka Construction and Demolition Waste Management Rules, 2016,” la ong u Bah Nonglang.
U la ong ba ha ka jingïakynduh ka Foundation ka la dawa ba dei ban pynpra beit bad ïa ka jingtei la mang pisa hi da ka tnat PWD (R). “Ki la ong ïa ngi ba kin pynpra beit ïa ka jingtei bad ki donkam pat ïa ka jingthoh na ka Foundation,” u la bynrap.
“Ka la mih ruh ka jingkren nangne nangtai ba ha Sor Shillong ki bun kum kine ki jingtei kiba la tap ïa ka wah. Sangeh noh shisyndon namarba ka Green Tech Foundation nangne shakhmat kan sa sdang ban leit jurip ïa kita ki jingtei,” ong u Bah Nonglang.
“Wat pynshlur ba ka jingtei ha Wah Thangsniang kan pynshlur pat ïa kiwei pat ki jingtei halor ki wah ka Sor Shillong,” la maham u Bah Nonglang.
