Shillong, Jymmang, 01: Ar tylli ki trok Dumper jong kawei ka Company kaba don ha ka shnong Bokmagre, Tura, West Garo Hills District ki la shah wiang ding ha ki riew shim kabu.
Ki Pulit ka Aramaile Police Station ki la ïoh jingtip halor kane ha ka por kumba 3 baje mynstep sngi Balang.
Marmar ki Pulit ki la pyntip sha ki Pulit ka tnat Fire and Emergency Services (F&RS) kiba la poi biang por ban pynlip ïa ka ding kaba la sdang ban klang ha ki ar tylli ki trok.
Ki Pulit kiba la poi ha kane ka jaka ki la lap ba ki ar tylli ki trok ki dang kem ding.
Hadien ba la lah ban tem ïa ka jingklang jong ka ding, la shem ba kawei ka trok kaba don ïa u nombar ML08-G- 9499 ka la ingkhong, katba kawei pat ka trok kaba don ïa u nombar ML08-G-1181 ka la ingkhong tang na ki bynta ba shakhmat.
Ha kaba ïadei bad kane ka jingjia ki Pulit ki la register case bad ki la pynlong ïa ka jingtohkit kaba bniah ban lap ksai ïa kiba donkti ha kane ka kam.
