Shillong, Jymmang, 29: Ka kynhun ki Pulit ka Home Guards & Civil Defence (CD&HG) ba la lamkhmat da u Sub-Inspector F. Lamare, ki la pynkynriah ia u dieng uba la ban ia ka kali bad ia ka iing jong u Bah Welson Shiangshai ha ka shnong Pamrakrai.
U Divisional Commandant of Home Guards, Shillong bad PRO ka Directorate of Civil Defence & Home Guards Meghalaya Bah PH Shylla, u la iathuh ba ka Quick Response Team, kaba don ha Khliehriat naduh ka por 11 baje mynmiet sngi Baar ki la ioh ia ki jingpyntip halor ki jingjia haduh ka por 8 baje mynstep bad marmar ki la poi sha ki jaka ba la jia ha ka por 9 baje mynstep. Ia ki dieng la weng noh mardor tang hapoh khyndiat kynta.
U Bah Siangshai u la ai khublei ia ka kynhun CD&HG na ka bynta ka jingkloi ban ai jingiarap.
Ha Tpeppale, West Jaiñtia Hills ka Quick Response Team ba la lamkhmat da u Sub-Inspector Y. Challam ki la hiar sha ka shnong Tpeppale ban pynkynriah ia ki dieng kiba la ngat ha ki waiar elektrik bad buh jingma ia ka leit ka wan jong ki paidbah.
Tang shu ioh jingtip halor kane, ka kynhun QRT ryngkat ki nongtrei jong ka Meghalaya Energy Corporation Limited (MeECL) bad ka tnat Forest ki la pynkynriah ia ki dieng bad ia ki waiar elektrik.
Da ka jingtrei shitom kaba la neh ar kynta la lah ban pynkynriah ia ki waiar bad ia ki dieng khlem da pynjulor ia ki nar post elektrik bad pynthud ia ka jingsam bording.
Ha rilum Garo kaba la shah ktah na ka ering Remal, ka kynhun SDRF ki la leit ai jingiarap mar mar kylleng ki bynta jong k Division. Da ka jinglamkhmat jong u Sub Inspector B. D Sangma, ka kynhun SDRF ka la ot ia ki dieng kiba la khyllem ha ki sainar elektrik ha surok kaba poi sha college of Community Science, Central Agricultural University,Sangsanggre,Tura ha ka sngi Baar.
Ha Matchakolgre, Tura, ha ka sngi Baar, ka kynhun SDRF ba la lamkhmat da u Sub-Inspector B.D. Sangma, ka la pynkhuid ia ki dieng kiba la ngat ha u nar post elektrik bad ha ki waiar ha.
Ha ka sngi Baar ka kynhun ba la lamkhmat da u Sub-Inspector B.D. Sangma ki la ot ia ki dieng kiba buh jingma ia kawei ka ing ha Babupara, Tura khnang ban pynthikna ba kiba sah hapoh ka ing kin ym mad ia ki jingjulor ha ki sngi ki ban sa wan.
Ia mynta ka kynhun ka dang weng ia ki dieng kiba la khyllem ha Tura Civil Hospital.
Ka kynhun Civil Defence & Home Guards (CD&HG) bad ka State Disaster Response Force (SDRF) ki la iai bteng ban trei shitom na ka bynta ban pynthikna ia ka jingshngaiñ jong ki paidbah da kaba ai jingiarap kyrkieh tang shu ioh jingtip.
