Shillong, Jymmang, 29: Ka jingjia ki jingiap jyllop, khamtam ki samla, la ioh jingtip ba ki la jia ha shilynter jong ka Wah Umtrew ha Byrnihat, Ri Bhoi District. Dang shen, uwei u samla uba la 26 snem ka rta ia uba la tip kyrteng kum u Ranjit Das na ka jylla Assam u la duhei ia laka jong ka jingim hadien ba u la ngam jyllop ha kane ka wah ha ka 26 tarik u Jymmang, 2024 na ka jingkiew kynsan jong ka um. Kane ka la jia namarba ka Meghalaya Electricity Corporation Limited (MeECL) ka la pyllait ia ka um khlem da pyntip paidbah ia ka jingmaham ban pyllait ia ka um.
Ka wah Umtrew ka dei kaba khring bha ia ki nongjngohkai na ka jylla Meghalaya bad na ka jylla Assam, khamtam ha ki bnai lyiur. Hynrei ka jingjia kaba la jia dang shen ka dei na ka daw ba ka MeECL kam shym la ai shwa ia ka jingpyntip khnang ban maham ia ki nongjngohkai pyrthei bad ia ki paidbah nongshong shnong shwa ban pyllait ia ka um.
Ki nongpyniaid shnong ba kynthhup ia u Amit R. Marak bad u Romen Ronghang, ki la pynpaw ia ka jingsngewkhia halor kine ki jingjia bad kynnoh ruh ia ka MeECL ka bym shym la ai lypa ia ka jingmaham kumba ka ju leh ha ki por kiba la dep.
Ha ki por ba mynshwa, ka MeECL ka ju ai lypa ia ki jingmaham ban pyllait ia ka um hynrei mynta ka kynti kam shym la ai satia ia ka jingmaham kaba lam sha ka jingduhei jong ki mynsiem briew kiba la ngam jyllop hapoh um.
