Mairang, Naiwieng, 11: Ka Khasi Students Union Mission Unit ba la lamkhmat da u General Secretary u samla Albert L. Mawlong ryngkat ki dkhot ki la ïohbat ïa ki san ngut ki nongbylla bar jylla kiba trei bylla hapoh u pud u sam jong ka shnong Mairang Mission, Eastern West Khasi Hills District.
Ha ka jingtohkit, ki dkhot jong ka seng ki la lap ba kine ki nongbylla bar jylla ki la poi sha ka shnong Mairang na ka bynta ban tah ïa ki tiles bad ki maw Marble ha kawei ka ïing bad kim don satia ïa ki kot ki sla kiba biang. Mar mar ki dkhot ka seng ki la phah lum ïa ki tiar ki tiar bad beh noh shisyndon ryngkat ka jingmaham tyngeh ïa kine ki briew ba kim bit ban wan phai biang hadien ba la shah beh.
Ka seng ka maham tyngeh ïa kiba ju mlien ban wanrah nong trei nabar ka jylla khlem da tohkit bniah la ki don ne em ïa ki kot ki sla kiba biang.
Ka Seng ka la kynnoh ruh ba bunsien ki don kiba leh Benami bad wanrah ïa ki briew kiba nabar da kaba shim kabu ha kiba bun ki liang. Ka Seng ka la pynpaw ba kan leh da kaba tyngeh ïa kino kino kiba leh Benami nangne shakhmat.
