Shillong, Jymmang, 12: Ki dkhot ka Khasi Students Union (KSU) Mawshynrut Circle ba la lamkhmat da u Assistant Organising Secretary u samla Korbar Marthong ha ka sngi Saitjaiñ ki la ïoh bat ïa kawei ka kali Pickup kaba don ïa u nombar AS18 AC 6193 kaba dap smam da ki bar jylla katba ka dang wan na ka jylla Assam bad kaba la rung lyngba ka Infiltration Check-gate kaba don ha ka shnong Aradongnga, West Khasi Hills District.
Ha ka jingtohkit, ki bar jylla ki la ïathuh ba ki dang thmu ban leit trei sha ka shnong Ummulong, West Jaiñtia bad haba ki dkhot ka seng ki la pan ïa ki kot ki sla na kine ki bar jylla kim don satia wat tang ban pynshisha ba ki dei ki nong India bad marmar ki dkhot ka seng ki la pynphai noh ïa ki bar jylla bad ïa ka kali kaba wan rung beaiñ sha ka jylla khlem ki kot ki sla kiba biang.
Ka seng ka la ther tyngeh ruh ïa ki bor Pulit kiba ap pahara ha Infiltration Check Gate da kaba kynnoh ba la shu pyllait laitlan khlem da peit bniah ïa ka jingrung jingmih jong ki bar jylla.
Ka seng ka la maham tyngeh lada ka dang lap nangne shakhmat kam banse ban buh hi noh ïa ka Infiltration Check Gate ha ki jaka ba ju rung bad mih ki bar jylla.
