Shillong, Jymmang, 12: Saw ngut ki briew ki la mynsaw bad uwei u khladnoh ha ka jingsyllad jong kawei ka trok kaba don ïa u nombar ML05 R 9977 katba ka dang wan na ka thaiñ Mawryngkneng. Kine ki saw ngut ki la mynsaw hadien ka trok ka la rat ïa ki lai tylli ki kali shwa ba kan leit rat sa ïa kawei ka dukan kat haduh ba la julor ynda poi ha Sawlad hajan Madanryting,Shillong.
Kane ka la jia ha ka sngi Saitjaiñ ha ka por kumba 9:44 minit mynmiet.
Ha kane ka jingjïa, u nongbud jong ka trok ïa uba la tip kyrteng kum u Shujumuddin Skeik, 34 snem ka rta u la khlad noh hadien.
Ïa u Shujumuddin Skeik la pynkit noh sha Civil Hospital, Shillong ban leh ïa ka post mortem hashwa ban aiti sha ki bahaing hasem.
Katkum ka jingtip ba la ïohlum la ïathuh ba la shu antad ba ka jingsyllad jong kane ka trok ïa kine ki lai tylli ki kali ka lah ban dei ba u nongñiah jong ka trok u Sanam Ali uba dei na Goalpara District, Assam um lah shuh ban tehlakam shuh ïa u lakam kali kat haduh ba ka ka la wanrah ïa kane ka jingjia basngewsih.
Namarba ka trok ka la sahkut ha ka dukan, ym shym la lah shuh ban sei ïa ki briew kiba don hapoh ka trok bad marmar ki Pulit ki la pyntip noh ïa ka kynhun Search and Rescue Team (SRT), Shillong ban ïarap sei ïa ki briew kiba la sahkut da kaba ot noh ïa ki bynta ba shakhmat jong ka trok.
