Shillong, Jymmang, 13: Ka PynChe ba kynthup ia ka Lamerphylla Kharsati, ka Maya Ika Lamar bad ka Dalarympei Kharmawphlang ki la pynlong ia ka prokram kaba la tip kum ka “Kilometre Zero” kaba khring ia ki briew kiba don ia ka sap shna, ka sap dro, ka jingpynneh pynsah bad ka shet ka tiew.
Ia kane ka prokram la pynlong ha Linsamer Farms, Kydemkulai, Ribhoi District ha ka sngi Saitjaiñ jong ka taiew baladep.
Kane ka prokram ka pyni kumno ngi lah ban ioh ia ki jhur ki jhep bad kiwei dei da kaba kheit ia ki sla ki kynbat na khlaw ba don ha Linsamer. Ka pyni kumno ruh ba ngi lah ban pynduna ia ka Carbon Footprint jong ngi bad ha kajuh ka por ruh ban rah burom ia ka jingiadei hapdeng ka mei mariang bad ka sap ka phong.
La lamkhmat ia ka prokram da ki nongshet ba pawnam, Chef Ahme bad Chef Dalarympei bad ki nongshim bynta ki la ioh ban mad ia ki jhur, ki kynbat ba bun jait kiba pynphuh pynphieng ia ka Linsamer Farms.
Ki nongshim bynta ki la iohlad ruh ban shim bynta ha ki kam pynpyngad jingmut (therapeutic art activities) ba la ialam da ka Maya-ika bad ki la ioh ban pynpaw ia ki jingsngew bad pyni la ki sap ki jinsngew jong ki ha ka Mural-making bad ruh ha kaba ki la ioh ruh ia ki Seed Papers ban thung kum ka dak jong ka jingpynthymmai bad jingkylla da kaba ki bret noh ia ki jingeh jingshon jong ki.
