Shillong, Rymphang 12: Namar ka jingpynjaboh ia ka jaka jngohkai pyrthei ha Ryndang Briew, kaba dang hap hapoh u pud u sam jong ka Mawiongrim, Shillong, ka Executive Committee jong ka Dorbar Shnong Mawiongrim ka ladep rai ban ym shah shuh iano iano ruh ban shong die jingdie ha Ryndangbriew View Point.
Kane ka la jia hadien ba ki nongdie madan na Mawiong bad na kiwei ki shnong ki la thmu ban sdang biang ban shong die jingdie biang ha Ryndangbriew View Point kaba dang hap hapoh u pud u sam ka shnong Mawiongrim.
Halor kane ka jingbym shah shuh jong ka Dorbar Shnong ban shong die jingdie ha kane ka jaka jngohkai pyrthei ha Ryndang Briew ka la mih ka jingiania hapdeng ki nongdie madan bad u Rangbah Shnong.
Ki nong die madan, ki la pynpaw ba ki la sdang ban shong die jingdie ha u snem 2019 bad hadien ka jingkhangdam na ka jingsaphriang jong u khniang jingpang COVID-19, ki la hap ban mih shwa shipor na kane ka jaka kum shi bynta ban bud ia ka jingbthah jong ka tnat ka Koit ka Khiah ka Sorkar Jylla.
Ki la pynpaw ba hadien ka jingkhangdam, ka Dorbar Shnong ka la pynmih da ka hukum ban ym shah shuh ban shong die jingdie da kaba kam ba kane ka dei ka hukum ba la pynmih na Ingbishar Meghalaya High Court.
Ryngkat ka jingsynran lang jong ki Pulit, u Rangbah Shnong ka Shnong Mawiongrim u Bah Sorbar L Nongpiur u la pyntip ba ka Shnong kam shah iano iano ba shong die ha Ryndangbriew View Point bad ia kiba shong die jingdie ha kane ka sngi, la phah ba kin mih noh na kane ka jaka.
