Shillong, ïaïong, 20: Ka Voice of the People Party (VPP) ha ka sngi Saitjaiñ ka la beh seng ia u dkhot jong ka State Executive Committee (SEC) Bah Avner Medon Pariat halor ka jingkren pyrshah ia ka party.
U Bah Pariat, uba la iakhun pyrshah ia ka MLA jong ka East Shillong Constituency ka Kong Ampareen Lyngdoh ha ka elekshon MLA jong ka Ingdorbar Thawain ka Jylla na ka tiket jong ka VPP, u la shah kynnoh ba u la kren pyrshah ia ka party da kaba iaroh ia kawei pat ka seng saiñ pyrthei ha ka rynsan Social Media.
U Chairman jong ka Disciplinary Committee u Dr. Kara H. Chen ha ka shithi ba la phah sha u Bah Pariat ula pyntip ba ka jingshim jong ka party ia kane ka sienjam ka long halor ka jingkren pyrshah jong u ia ka party kaba pyntroin ia ka jingtrei shitom ban pynkhlain ia ka party.
Ha kane kajuh ka sngi, u Bah Avner Pariat u la phah ia ka shithi iehnoh kam sha ka VPP ia kaba la phah ruh sha ki lad pathai khubor.
Ha ka shithi iehnohkam u Bah Pariat u la pyntip ba un ym leit pyniasoh sha kano kano ka seng sain pyrthei ia mynta shipor.
