Shillong, ïaïong, 20: Tang hapoh arphew saw kynta ba u Pator barim jong ka Sumer Patorship, East Jaiñtia Hills District u Bah Remington Paslein u la kam ba ka don ka jingthep vote tuh ha Pala Polling Station kaba hap hapoh ka Sutnga Saipung Constituency ha ka elekshon Lok Sabha kaba la long ha ka 19 tarik mynta u bnai une u rangbah ha ka sngi Saitjaiñ u la phah da ka jingujor sha u Deputy Commisisoner jong ka East Jaintia Hills District u Abhilash Baranwal da ka jingkyrpad ban tohkit bniah lyngba ka CCTV ba la pyndait hapoh ka Polling Station khnang ban lap ia ka jingthep vote tuh kumba u la kynnoh.
Ha ka ujor u sha u Deputy Commisisoner u Bah Pasleiñ u la ong, “nga kyrpad ia phi hakhmat ka burom jong phi ba phin sngewbha ban phah tohkit ia ka CCTV footage kaba don hapoh ka Pala Polling Station kaba hap hapoh 5-Sutnga Saipung Constituency, East Jaiñtia Hills District.”
“Namarba ha kane ka sngi thep vote jong ka 1-Shillong (ST) Parliamentary Constituency jong ka Lok Sabha, kata, ha ka 19 /04/2024 ba don ki biew ba pyyndonkam bad leh donbor ban thep ia ka vote jong kiwei pat ki briew. Kumta, nga la wan ban dawai ia ka hok jong nga na ka office ba donburom jong phi ba phin sngewbha ban phah tohkit ia ka CCTV footage khnang ban lap ia ka jingshisha, katkum ba nga la dawa,” la ong u Bah Pasleiñ.
Ha ka sngi Thohdieng, u Bah Pasleiñ u la kam kam ba u la sakhi da la ki jong ki khmat ia ka jingthep vote tuh ha Pala Polling Station.
Haba pyntip ia kane ka jingjia sha u nonglum khubor lyngba ka telephone, u Bah Pasleiñ u la kam ruh ba wat haba la pyndait ia ka CCTV hapoh kane ka Polling Station hynrei ka jingthep vote tuh ka la iaid beit shakhmat naduh ba u la poi ha kane ka Polling Station ka por 9 baje mynstep ban thep ia ka vote.
Shuh shuh u la kam ruh wat haba u la iakren bad u Presiding Officer bad ia u Rangbah Shnong ban pynsangeh ia kane ka jingthep tuh ia ka vote jong kiwei hynrei kim shym la sngap satia bad kynnoh ruh ba u Rangbah Shnong u ong ba kam shym la mih kano kano ka jingkulmar.
Halor kane, u Bah Pasleiñ u la iathuh ba u la ujor lyngba ka telephone sha u Deputy Commissioner (Election) uba dei ruh u District Election Officer (DEO) ka East Jaiñtia Hills District u Abhilash Barwanwal khnang ban pynsangeh ia ka jingthep vote tuh ha kane ka Polling Station.
Haba pyrshang ban kylli na u Deputy Commissioner jong ka East Jaintia Hills u la pyntip lyngba ka SMS ba u la phah tohkit ha u Sector Officer ban ioh ia ka kaiphod kaba bniah.
