Shillong, Iaiong, 22: Lai ngut ki samla Khasi kiba shong basah ha ka shnong Thangskai, East Jaintia Hills District ki la mynsaw hadien ba ki la shah kawut lathi ha ki shipai Border Security Force kiba ju ap pahara ha jingkieng ha ka shnong Sonapyrdi.
U General Secretary jong ka Khasi Students Union, East Jaintia Hills District u Bah KS Suchiang ha ka jingiakren bad u nonglum khubor jong ka Batesi Tv lyngba ka telephone u la iathuh ba kane ka la jia ha ka por 9 baje mynmiet jong ka sngi u Blei ka 21 tarik u Iaiong, 2024 katba ki dang mih na Thangskai ban leit sha ka shnong Shymplong.
Katkum ka jingiathuh jong une u nongialam ka KSU, napdeng ki lai ngut kiba la shah kawut lathi ha ki shipai BSF arngut ki la kham mynsaw jur.
Nalor kata, kine ki shipai BSF ba la kynnoh ba ki la buaid khawyiang ki la pynjulor ruh ia ki ar tylli ki kali ba la shong da kine ki samla Khasi.
U Bah Suchiang u la iathuh ba kine ki samla ki la leit ujor da ka ejahar ha ki Pulit jong ka Lumshnong Out Post hynrei na ka liang jong ki Pulit ki la ong pynban ia kine ki lanot ba kin pyrkhat bha shwa ba kin mudui ejahar ia ki shipai BSF.
U la ong ruh ba ka seng kan iai dawa ia ka sorkar ban pynkynriah noh mardor ia ki shipai BSF na Sonapyrdi sha khappud khnang ba ki paidbah nongshong shnong kin ym kylla sohpdung na ka por sha ka por na ka jingpynibor ba palat pud jong ki shipai.
Ha kaba iadei bad kane, ka KSU kan sa shong jingialang ha ka 23 tarik u iaiong, 2024 ha ophis treikam ha Lad Rymbai bad ban dawa ia ka Sorkar ba kan dei ban weng noh mardor ia ki shipai BSF na Sonapyrdi.
