Shillong, Nailur, 14: Ka All Khasi Meghalaya Tourist Taxi Association kaba long ka kynhun jong ki nongniah kali kamai Local Tourist Taxi ha ka Sngi Saitjaiñ ka la kyntait war ïa ka jingkynnoh bad ka jingkam jong u Myntri ka Sorkar Jylla uba khmih ïa ka tnat Jngohkai Pyrthei u Bah Paul Lyngdoh ba ka don ka jingïapait hapdeng ki nongñiah Local Tourist Taxi.
“Ngi la ai ïa ka shithi jingpynkynmaw bad ha ka jingshisha u (Bah Paul) ladei ban pule bad ban peit bniah hynrei u ong ba ym lah ban khot sha ka miej jingïakren namarba ngi ki Association ngim ïa tylli. Hynrei na ka liang jong ngi, lada ngi don sha kano kano ka Association hynrei haduh mynta mynne ba ngi la pynlong ïa ka jingïakhih, ngim pat don kata ka dak ka shin ba ym don ba kyrshan ïa ka mat jingïakhih jong ngi. Baroh ngi ïa tylli mlon bad ngi dang ïakren hi ïa baroh ki nongïalam na ki distrik bad ha East Khasi Hills ruh kiba don,” ong u President ka AKMTTA u Bah Ricaldinus Dohling ha ka jingïakren bad ki lad pathai khubor.
“Lada ki paidbah ki sngewthuh ïa ka jingkren jong u Myntri ka pynpaw shai ba ka Sorkar kam kwah ïa ki kam pynroi ban pynbit pynbiang ïa ki Hospital, ne ki jingdonkam, jingpule bad kumta ter ter. Lada ki paidbah ka Bri u Hynñiewtrep ki sngewthuh ïa ka jingkren jong u Myntri ba dang shaniah ïa ki hospital na Assam bad kiba bun ki jingdonkam ka pynpaw shai ba ka Sorkar kam kwah ban wanrah ïa ki kam pynroi ha ka jylla Meghalaya bad ka dang kwah beit ban pynjynjar ïa ngi ki paidbah,” la kynthoh u Bah Dohling.
U la ïathuh ba ka jingïakhih jong ki nongñiah local Tourist Taxi kan dang bteng watla ka jingbuh por ka long tang haduh ka 9 tarik haduh ka 14 tarik mynta u bnai.
Haba kylli, u la ong, “ngi la pynshai ba ngi dang donkam shwa ban pynlong ïa ka jingïakhih kaba rit hynrei haduh mynta kam pat don ka jingai ktien na ka Sorkar. Haduh mynta ki don 35 tylli ki Association kiba la ïa synrop lang ban kyrshan ïa ka jingïakhih jong ka AKMTTA.”
“Lada ka Sorkar kam khot ïakren, ngin sa pynlong da ka jingïakhih kaba kham tyngeh ba ngin sa pynlong ïa ka jingïalang kaba heh ha madan Malki. Nga kyrpad ïa ki nongñiah local taxi ba kin wan ïashim bynta ha kane ka jingïalang ka ban sa long ha ka 18 tarik mynta u bnai khnang ban pyni ïa ka jingïatylli jong ngi,” la kyntu u Bah Dohling.
Ka AKMTTA ka la pynlong ïa ka jingïakhih da kaba teh lama iong kum ka jingdawa ïa ka Sorkar Jylla ban khanglad ïa ki nongniah kali kamai Tourist kiba nabar ka jylla ban kit ïa ki nongjngohkai pyrthei sha ki jaka jngohkai kiba don ha kylleng ka jylla Meghalaya.
Ha kajuh ka por ka AKMTTA ka la dawa ruh ba ka Sorkar Meghalaya Democratic Alliance (MDA) ba la ïalam da ka National Peoples Party (NPP) ban thaw da ka polisi kumba long ha ka jylla Sikkim khnang ban khanglad ïa ki kali Tourist kiba nabar ka jylla ban kit ïa ki nongjngohkai sha ki jaka jngohkai pyrthei kiba don ha ka jylla.
