Shillong, ïaïong, 24: Ka Khasi Students Union (KSU) ha ka sngi Balang ka la maham ïa ka sorkar ba kam dei shuh ban dang aiding da kaba kem ïa ki dkhot jong ka seng ha kaba ïadei bad ka jingshah pynïap jong ki arngut ki bar jylla ha ka shnong Ichamati bad uwei u nongbylla misteri ha Mawlai Mawroh.
U Issan Singh bad u Sudip Dutta ki la shah pynïap klep ha Ichamati bad Dalda ha ka 27 tarik, Lber katba u Arjun Ray u la shah bom pynmynsaw ha ki runar ha ka 10 tarik mynta u bnai bad khladnoh ha NEIGRIHMS Hospital namar ka jingmynsaw jur.
Haduh mynta, ki Pulit ki la kem haduh saw ngut ki dkhot jong ka KSU halor kine ki jingjia.
Haba kynthoh halor ka jingshah pynïap jong u Lurshai Hynniewta ha Ichamati, u President ka KSU samla Lambokstarwell Marngar ha ka jingïakren bad ki lad pathai khubor u la ong, “ha ka por ba la shah pynïap u Lurshai Hynñiewta shano ki jah kita kiba donkti ban pynïap ïa une u samla. La shu ong ba la kem katta ngut hynrei ym tip shaei ki set bad ym ju pat ïohi hi ruh wat ïa ka dur ka dar bad kumba ïoh jingtip wurwur werwer kiba bun kiba donkti ban pynïap ïa u Lurshai ki la jah bad ki la phet shaei ngim tip. Kane ka dei ka jingphiel jong ka Sorkar ba kan ym lah ban ai ïa ka jingbishar kaba hok.”
“Pylleiñ pyllein kat kato ka jingjia ha Ichamati bad phi la ïohi lyngba ki video ki (bar jylla) rah da ki tiar ki tar hynrei ïa ki samla Khasi kynthup ïa ki dkhot ka KSU tang na ka jingsuba la shu tan bad shu pharep bad la pyngnat ha ki kyndon aiñ bapher bapher. Kam pher bad kam leilei ngim shym la rit mynsiem,” u la ong.
“U kyrwoh na ka seng baroh kawei sha ki samla ka KSU kylleng ka Bri u Hynñiewtrep, to long skhem, long rangbah katba ki (Pulit) nang pyntyrha ngin nang khlaiñ bad katba ngi dang lah ban ïaishah ngin ïaishah beit. Ynda la theh shi theh petrol ka Sorkar ai kan mat sa sngewthuh hi bad ba ka Sorkar kumno kan pynlip ïa ka ding,” la maham u President ka KSU.
“Nangne shakhmat lada ka (Sorkar) dang ïai pyntyrha shi pyntyrha, ynda la kut ka jingïaishah jong ngi ruh ka por kan sa batai ïa kiei kiei baroh. Ïa ki jingshah kynnoh bad shah pharep borabor ngi la shu ïai sngap bad ïaishah baroh shikatta. Ki don ki Agency jong ka Sorkar ba tang shu jia eiei ki la shu peitkhmat beit tang ïa ki dkhot jong ka KSU, ym tang ïa ki dkhot ka KSU hynrei la shu mareh ban kem ïa ki samla Khasi hynrei lada jia kano kano ka jingshah thombor jong ki Khasi ka aiñ ka pyrla ka noh shiliang,” la kynthoh u samla Marngar.
“Lada ka Sorkar ka kwah ban ïalehkai bad ka kwah ban aiding ïa ki khun samla hapoh ka Bri u Hynñiewtrep, kita kiba bat ïa u lakam jong ka synshar ka khadar ki hap ban shim ïa ka jingkitkhlieh. Kum ka seng ngi la ïaid lynti la 46 tylli ki snem bad kine ki jingjia kim long shuh kiba thymmai bad kam shym mut haba ngi kren ïa ki ishu bapher bapher kiba ktah ïa ka ri bad ka jaidbynriew bad khamtam kiba ktah ïa ki samla ha ka pule puthi kam shym mut ba phin shim ba ngi long ki diengpynkiang ban shu kynnoh kut ki jaitkam ba la jia,” u la ong.
“Ngi sngewthuh ba ki (Pulit) ju pynngat ha ki kyndon ain bapher bapher ïa ki dkhot ka KSU haba don kino kino ki jingjia hynrei ka seng ka kwah ban ong lada ka Sorkar ka dang tak shi tak ha kine ki sngi ki ban wan ka Sorkar ka dei ban sngewthuh kaei ka ban sa jia nangne shakhmat. Ngim shym la bamja khluit ïa kano kano ka kam, ngim shym la kwah ban pynmih ïa kano kano ka huri hura hynrei ngi ïohi ba ka Sorkar ka khot sngewbha ban mih ki kynrum kynram hapoh ka jylla baroh kawei,” la bynrap u nongïalam ka KSU.
