Shillong, ïaïong, 24: Ki Pulit jong ka Shillong Traffic Police (STP) ha ka sngi Balang ki la talasi kyndit ïa ki thuk thuk ar shaka ha IGP Point ki bym don ïa ki kot ki sla kiba biang, ïa ki nongñiah ki bym don laisen, ïa ki thuk thuk kiba pyndait da ki Modified Silencer.
Ka jingtalasi ïa kine ki thuk thuk ar shaka ka long hadien ba ka tnat Pulit ka la ïoh ujor halor ka larlar shaba palat jong ki nongñiah ar shaka kat haduh ba ka ju pynwit haduh katta katta ïa ki nongñiah kali bad ïa ki nongñiah ar shaka kiba ïaid ha la ka jong ka lynti katkum ka aiñ.
Ha kane ka jingtalasi, ki Pulit ki la lap ïa ki thuk thuk bakynthup naduh ki Motor Bike bad ïa ki Scooty ki bym don ïa ka Registration Certificate, ki bym siew ïa ka Insurance, ki bym pyndait ïa ki Number Plate HSRP bad ïa kiba pyndait da ki Modifief Silencer.
Ki Pulit ki la shu daiñ kuna ryngkat ka jingmaham ba kim bit satia ban pynkheiñ ïa ki kyndon jong ka Motor Vehicle Act.
U Superintendent of Police (Traffic) u K. Prasad ha ka jingïakren bad ki lad pathai khubor u la ïathuh ba ha ka jingtalasi kali kaba ar sngi kynthih ki Pulit ki la ïoh lum haduh 2 lak tam na kaba dain kuna ïa ki nongpynkheiñ aiñ bad ong ruh ba ka tnat Pulit kan dang ïai bteng manla ka sngi ban talasi ïa ki thuk thuk ar shaka.
