U CLEENSTAR U DONKTI 10 TYLLI KI CRIMINAL CASE, U GARY RINALDY 3 TYLLI: SP (CITY)
Shillong, ïaïong, 24: Arngut ki dkhot jong ka Khasi Students Union (KSU) kiba la shah kem ha ki pulit ha ka sngi baar ki la shah tian bishar ha Kashari jong u District and Session Judge ka East Khasi Hills District ha ka nohphai sngi jong ka Sngi Balang.
U Superintendent of Police (City) Pankaj Kumar Rasgania u la pyntip kine ki arngut ki dkhot ka KSU kiba la shah kem ki dei kiba la tip kyrteng kum u Cleenstar Shabong, 27 snem ka rta uba sah ha Nongthymmai Pohktieh, Lane-5, Shillong. La kem ïa u halor ka case ba la rejistar ha Shella Police Staton halor ka jingshah pynïap jong u Sobir Dutta ha Ichamati.
U SP (City) ka la aibor ban set ha along jong ki Pulit haduh 7 sngi khnang ba kin ïoh pynlong ïa ka jingtohkit kaba bniah.
“Nalor kane ka case, u Cleenstar Shabong u donkti ruh ha ki 10 tylli ki case bymman, ha kaba la pynngat kyndon pyrshah ïa u tang ha kawei ka case.
Katba ha kaba ïadei bad ka case ba la rejistar ha Mawlai Police Station halor ka jingshah pynïap jong u Arjun Ray ha Mawlai Mawroh ki Pulit ki la kem u Gary Rinaldy Mawlieh, 25 snem ka rta uba sah ha Mawlai Mawroh Kseh.
U SP (City) u la pyntip ba ka Kashari ka la aibor ban set haduh 12 sngi ha ka along ki Pulit khnang ba kin ïoh pynlong ïa ka jingtohkit kaba bniah bad ha kajuh ka por u la pyntip ba u Gary Rinaldy Mawlieh u dei uba donkti shuh shuh sa ha ki 3 tylli ki case bymman, ha kaba la pynngat kyndon pyrshah ïa u ha ki ar tylli ki case.
Ka jingtohkit pyrshah ïa kine ki arngut kiba la shah kem kan dang ïaid shakhmat ban ithuh bad ban ïohkem shuh shuh sa ïa kiwei pat kiba donkti ha kine ki jngjia, la ïathuh u SP (City).
Ha ka 2 tarik mynta u bnai arngut ki dkhot ka KSU South Khasi Hills Unit ba kynthup ïa u Shambor Shati bad u Meshadap Sohpen ki la shah kem halor ka jingkynnoh ba ki dei kiba donkti ha ka jingshah pynïap jong ki arngut ki nongbylla tih maw ha Ichamati, East Khasi Hill.
Haduh mynta kiba la shah kem ki long saw ngut, kata, lai ngut halor ka jingjia ha Ichamati bad uwei halor ka jingjia ha Mawlai Mawroh.
