Shillong, Naitung, 07: U Superintendent of Police ka East Khasi Hills District u Bah Sylvester Nongtnger uba la leit jurip ia ka jingshah wiang ding jong ki kali ha Laitumkhrah Police Station, u la iathuh ba ka jingiakajia hapdeng ki arliang mamla ka la sdang shwa na surok ha ka miet jong ka sngi palei bad kane ka jingiakajia ka la bteng ruh wat hadien ba ki arliang manla ki la poi ban ia mudui ejahar mar kylliang haduh Police Station.
Ha kane ka jingjia, ki kali ba la pynieng ha phyllaw jong ka Laitumkhrah Police Station ba kynthup ia kawei ka kali Gypsy Pulit kaba don ia u nombar ML02-0238 ka la shah wiang ding katba ka kali Tourist kaba don ia u nombar ML05-Y-9977 ka la shah pynjulor na ka jingshah kawang maw bad kawei ka thuk thuk ar shaka kaba don ha kane kajuh ka jaka ka la julor malu mala.
Shwa kane, u Bah Sylvester Nongtnger lem bad u SP (City) Bah Vivek Syiem ki la shong jingialang bad ki Ophisar Pulit jong ka Laitumkhrah Police Station ryngkat lang bad ka MLA jong ka Laitumkhrah Constituency ka Dr. Ampareen Lyngdoh kaba long ruh ka Myntri jong ka Sorkar Jylla ryngkat ka jingdonlang jong u MDC ka Laitumkhrah-Malki u Bah Joseph Fantin Lakadong ban iakren sani halor kane ka jingjia kaba la pynkyndit ia baroh ki nongshong shnong ka nongbah Shillong.
Ha ka jingiakren bad ki lad pathai khubor, u Bah Nongtnger u la iathuh ba ki Pulit ki la register case halor kane ka jingjia bad ka jingtohkit kan sa iaid shakmat shwa ban kem ia ki briew kiba donkti ha kaba wiangding ia ki ar tylli ki kali ba la pynieng ha phyllaw jong ka Laitumkhrah Police Station.
Ha kajuh ka por u la kyntait ruh ia ka jingkynnoh ba ki Pulit kiba don ha ka kamram hapoh ka thanat kim shym la pdiang satia ka ejahar ba la mudui ha ka miet 6 tarik Naitung, 2023.
“Ka jingkajia ka dei kaba rit, ka don ka jingiakajia sha surok bad ym dei hapoh thanat hapdeng ka kynhun jong ki Khynnah Khasi bad kiwei pat ki jaidbynriew. Ynda la poi hapoh thanat ban ujor ejahar ki sdang ban iakajia paramaki bad ki aireng ruh wat ia ki ophisar kiba don ha ka kamram hapoh thanat,” ong u Bah Nongtnger.
U la iathuh hadien ba u Officer In-charge u la bthah ba kin ujor da ka ejahar, kawei ka kynhun ka la ujor ia ka ejahar katba kawei pat ka la kyntait ban ujor ia ka ejahar bad na ka liang jong u Ophisar u la batai katba lah namarba ki la kyntait ban ujor ejahar.
“Hadien ki wan bun ki briew kiba ngim lah ban batai, shiteng ki rung shapoh bad shiteng ki ieng shabar. Katba ka dang don ka jingiakren pynbeit shapoh, kiba ieng shabar ki la thang ia ki kali,” la iathuh u Bah Nongtnger.
Haba kylli, hato ki Pulit ki la ithuh neem ia kiba donkti, u SP u la ong, “ngi la ithuh ia ki katto katne bad ia ka case ladep rejistar bad ki Pulit kin sa pynlong ka jingtokit.”
U la ong ruh ba ka tnat Pulit ka la pyrshang katba lah ban tehlakam ban pynneh ia ka shongsuk shongsaiñ bad ong ruh ba ym shym la khmihlynti ba kane kan mih ka jingjia kaba heh haduh katne.
Halor ka jingkynnoh ba ki Pulit CRPF ki la kawut lathi, u SP u la ong, “kito ki khynnah kiba don hangne hynin mynmiet ki pyrshang ban knieh ia ki suloi jong ki CRPF bad ki CRPF ki don ka hok ban iakhun bad ki CRPF ki ladep la ka kamram bad ki la mut ban leit phai noh sha jaka sah lajong. Hadien ba la mih ki Ophiar jong ngi nangne (Thanat) ki la pyniasuk bad ki CRPF ki la leit noh.”
