Shillong, Lber, 27: Khnang ban pynneh pynsah ia ka shongsuk shongsaiñ ha khappud jong ka jylla Meghalaya bad Assam namar ka jingdon jong ka Elekshon Lok Sabha, u Chief Secretary ka Jylla Bah Donald P. Wahlang, ha ka sngi Balang u la lum ka jingialang bad u Additional Chief Secretary ka tnat Home (Police) Dr. Shakil P. Ahammed, u Director General of Police Dr. Lajja Ram Bishnoi, u Commissioner and Secretary, ka tnat ERTS Sanjay Goyal, u Chief Electoral Officer Dr. B.D.R. Tiwari, bad ia ki ophisar jong ka tnat Election, u Secretary ka tnat Home (Police), u Inspector General (IG) ka Frontier Headquarters, BSF Meghalaya bad ia ki State Police Nodal Officer ba kynthup ia u M.K. Singh.
Ha kane ka jingialang kaba la long ha Main Secretariat, Shillong, u Chief Secretary u la pan jingtip halor ki jinglong jingman ha khappud shwa ban wan ka elekshon Lok Sabha.
Katkum u kyrwoh ba la phah da u Joint Chief Electoral Officer ka Sorkar Jylla u la pyntip ba u DGP Dr. Lajja Ram Bishnoi u la pynsngew halor ka jingteh lam ia ka shongsuk shongsain ha ka jylla bad ha ki jaka khappud.
U la iathuh ruh ba ka don ka jingiatreilang kaba jan bad ki Pulit ka Jylla Assam ban pynneh pynsah ia ka shongsuk shongsaiñ ha khappud.
La pyntip ruh ba ka Election Commission of India (ECI) ka la buh sngi ban pynlong ia ka jingialang Inter-State Border Meeting ha ka 3 tarik,Iaiong, 2024 bad ka Jylla Assam.
“La iakren ruh halor ki lad ki lynti kumno ban peitngor ia ka jinglong jingman ha khappud, ban iada, ban kem ia ki nongthaw jingkulmar, ban khang ia ki khyrdop rung bad mih bad ia ki jaka khappud ba dang long laitlan, ban pynbna ia ka sngi tyrkhong kiad bad ka sngi shuti ba hap siew bainong, ka jingpyntreikam ia ki NBW bad kiwei kiwei,” la pyntip u Joint Chief Electoral Officer ka Sorkar Jylla.
