Shillong, Lber, 27: U MLA ka North Shillong Constituency Bah Adelbert Nongrum ha ka sngi Baar u la phah da ka jingthoh sha u Myntri ka tnat Bording ka Sorkar Jylla u Abu Taher Mondal da kaba kyrpad ban pynkynriah ia ka tarik ban khang ia ka jingiaid ki kali lyngba ka jingkieng Damsite ka ban sdang naduh ka 31 tarik Lber, 2024.
Lyngba kane ka shithi, u Bah Adelbert u la kyntu ia u Myntri ba un pynkynriah ia ka sngi ban khang iaid kali na jingkieng Umiam sha ka 1 tarik, Iaiong, 2024 namar ka jingud jingnam jong ki paidbah kiba hap ban iaid lyngba kane ka jingkieng bad ba ka 31 tarik ka hap ruh ha ka sngi u Blei kaba dei ka sngi rakhe jong ki riewngeit Khristan ia ka Easter Sunday ne ka sngi Mihpat jong u Trai Jisu.
“Ki la don ki paidbah kiba pynsngew sha nga kum u MLA ban pynpaw ia kine ki jingdawa hakhmat ka Sorkar bad nga kyrpad ruh ia u Myntri ka tnat Bording ba un pdiang ia kane ka jingtyrwa namarba ka jingpynkynriah ia ka sngi kan long tang na ka bynta shi sngi,” u la ong.
U la kynthoh ruh ba ka jingshong synjor jong ka jingkieng Damsite ka dei hi ka jingleh jong ka Sorkar Jylla naduh mynshwa namar ka jingailad ia ki trok kiba kit palat 6 ton shaneng wat haba ka la tip shai ba ka jingkieng ka dei kaba la rim bha bad kaba ka jingim ruh ka la kut.
