Shillong, Lber, 27: Ar tylli ki metiap jong bar jylla la lap ha ka janmiet sngi Balang ha ka shnong Ichamati bad Dalda kaba hap hapoh ka Shella Police Station, East Khasi Hills District.
Kane ka la jia ryngkat, ha kane ka sngi ba ka Khasi Students Union (KSU) ka la pynlong ia ka jingialang ha ka por mynsngi ban pyrshah ia ka Citizenship (Amendment) Rule, 2024.
La suba ba ki runar ki la shim kabu ha kane kajuh ka sngi ban dkhat jubor ka jingim jong ki arngut ki bar jylla.
Katkum u kyrwoh ba la phah da u Superintendent of Police ka East Khasi Hills District u Rituraj Ravi, ki arngut ki bar jylla ba la suba shah pyniap ki dei kiba la tip kyrteng kum u Esan Singh bad u Sujit Dutta. Ia ka met iap jong kine ki arngut la lap na ka shnong Ichamati bad Dalda.
U SP u la pyntip ba ki Pulit ki la pynlong ia ka jingtohkit kaba bniah bad ia ka Post -mortem ym pat leh satia.
Halor kane ka jingjia, ki Pulit ka Sohra bad Shella bad kynthup ruh ki Pulit na Shillong ki la hiar sha ka shnong Ichamati bad Dalda kiba don ha khappud bad ka ri Bangladesh ban pynkhlaiñ ia ka jingpahara bad ban pynneh ia ka shongsuk shongsaiñ.
Kumba ka long mynta, ka jinglong jingman ha ka shnong Ichamati bad Dalda ka la pynsyier mynsiem ia ki nongshong shnong khamtam ia ki bar jylla.
Namar ka jingdon jong ka elekshon Lok Sabha, ki bor synshar ka Sohra Civil Sub-division ki lah ban pynjari da ka Section 144 CrPC ban tem ia kino ki jingiakulmar bad ban pyrkhing ia ka leit ka wan, ka jingialum briew shi jaka bad ka jingrah ia ki tiar pynmynsaw.
