Shillong, Lber, 11: Ka Sorkar Jylla ka la shim ia ka sienjam bakongsan bha ban pyntyllun shakhmat da kaba buh mawnongrim na ka bynta lai tylli ki projek ba kongsan, ban shna ia ka New Shillong Water Supply Scheme, ka Land Reclamation Project ha Waste Processing and Disposal Site ha Marten, Mawlai bad ka jingshna ia ki Internal Roads hapoh ka New Shillong Township Land ha ka shnong Mawkhanu bad Mawpdang.
Ha kane ka sngi, la sakhi lang da u Myntri Rangbah ka Jylla u Conrad K. Sangma, u Symbud Myntri Rangbah uba khmih ia ka tnat Pynroi Sor u Bah Sniawbhalang Dhar, u Myntri ka tnat PHE bad Soil & Water Conservation u Marcuise N. Marak, ka Myntri ka Koit ka Khiah ka Dr. M. Ampareen Lyngdoh, ki ophisar bad ki rangbah shnong.
Haba kren ha kane sngi, u Conrad Sangma, u la ong ba ka New Shillong Water Supply Scheme kan long kawei na ki projek kaba heh tam ba la bei pisa da ka Sorkar Jylla bad ka dei ruh kawei na ki projek kaba la pyrkhat janai bha.
Ban weng ia ka jingdawa um ha Shillong, ia ka New Shillong Water Supply Scheme yn sa pyntreikam da ka tnat PHE. Lyngba kane ka projek la thmu ban sam ia ka um kaba khuid sha New Shillong Township, ha ki shlem pule, ha ki ophis treikam bad ha ki laiphew ar tylli ki shnong kiba marjan.
Da kaba khmihlynti ba ia kane ka projek yn shna pyndep hapoh 36 bnai, u Myntri Rangbah u la ong, “kane ka projek kan kot kumba T. 1600 klur ban pyntreikam bad ha kaba wat kaba nyngkong, yn sa pynlut pisa T.500 klur.
Na ka bynta ban shna ia ki surok, u la ong, “ia kine ki surok yn sa shna ha ka shnong Mawkhanu ha ka jinglut kaba kot kumba T.185 klur. Katba ngi dang kren, ka projek kaba T. 380 klur ka la nang iaid ha ki bynta ka New Shillong, ha ka Knowledge City bad ha ka Administrative City.”
Ha kaba iadei bad ka jingshna ia ka Land Reclamation Project ha ka Waste Processing and Disposal Site kaba don ha Marten, u Sangma u la ong, “ia baroh ki jaboh jabaiñ yn sa pyndonkam biang. Kumba la khmihlynti ba hapdeng ki 12-18 bnai, ngin sa lah ban ioh ia ka jingkylla dur ha Marten. Ngi khmihlynti ba tang shu pynkynriah ia ki jaboh jabaiñ, ka jingthmu jong ngi ka long ban pynkylluid ia ka jaka bad ban pynkylla ia ka jaka thehniut sha ka jaka kaba ki paidbah ki lah ban pyndonkam.”
U la bynrap ba ia kane ka projek yn sa pyntreikam ruh ha kiwei kiwei ki district ban pynthikna ban pynlang shi jaka ia ki jaboh jabain. U la ong ba ka Meghalaya kan sa kylla dur. “Ngin sa mang pisa kumba T. 10,000 klur ha ki saw snem ban sa wan ha Knowledge City bad ha New Shillong City.”
U Bah Sniawbhalang Dhar u la ong ba ka dei ka jinganngud kaba la slem jong ki paidbah ban iohi ia kine ki projek ba kin urlong noh bad kyrmen ban iohi ia ka jingkylla ha kane ka jylla ha ki 5 bad 6 snem ban sa wan.
Halor ka jaka thehniut u Bah Dhar u la khot bad wer ia ki paidbah ban iatreilang namarba ka jaka thehniut kam dei tang ka ishu kaba ktah ha Shillong hynrei wat ia kiwei k iwei ki bynta jong ka jylla.
